विशेष अनलाइन । नेपाली चलचित्र क्षेत्रमा यतिबेला चरित्र अभिनेताका रूपमा सुशील सिटौलाको माग ह्वात्तै बढेको छ। एकपछि अर्को गर्दै नयाँ चलचित्रहरूमा अनुबन्धित भइरहेका सुशीललाई हालै मात्र नयाँ चलचित्र ‘महाराजधिराज’का लागि छनोट गरिएको छ। बिहीबार निर्माता विराज विष्ट र सुशीलबीच यस चलचित्रका लागि औपचारिक रूपमा लिखित सम्झौता सम्पन्न भएको हो। केही समयअघि मात्र चलचित्र ‘पाँच पाण्डव’को काम सकेका र शुक्रबार मात्रै अर्को चलचित्र ‘अक्षरा’को शुभ मुहूर्त गरेका सुशीलको व्यस्तताले उनको बढ्दो लोकप्रियतालाई प्रस्ट पार्छ।
निर्माता विष्टका अनुसार ‘महाराजधिराज’मा सुशील एक अत्यन्तै महत्त्वपूर्ण र शक्तिशाली भूमिकामा देखिनेछन्, यद्यपि उनको भूमिकाको विस्तृत विवरण भने अहिले गोप्य नै राखिएको छ। परिच्छेद सेनको लेखन तथा निर्देशनमा तयार हुन लागेको यो चलचित्रमा कलाकारहरूको ठुलो र अनुभवी टोली समेटिएको छ। चलचित्रमा सुशीलका साथै पुष्प खड्का, केकी अधिकारी, आर्यन सिग्देल, रमेश उप्रेती, पूजा शर्मा, नीर शाह, हेमन्त बुढाथोकी जस्ता दिग्गज र लोकप्रिय कलाकारहरूको अभिनय रहनेछ।
यो चलचित्रको मूल कथावस्तु अभिनेता पुष्प खड्काले निर्वाह गर्ने ‘अधिराज’ नामक पात्रको वरिपरि केन्द्रित रहने बताइएको छ। चलचित्रमा उषा रजक, हिउँवाला गौतम, जयकिशन बस्नेत, शिशिर भण्डारी र गजित विष्ट लगायतका अन्य कलाकारहरूको पनि मुख्य भूमिका रहनेछ। एउटै पर्दामा यति धेरै स्थापित कलाकारहरू देखिनुले यो चलचित्रलाई लिएर दर्शकमाझ निकै उत्सुकता पैदा गरेको छ।
चलचित्रको निर्माण पक्षले आगामी वैशाख अन्तिम साताबाट छायांकन सुरु गर्ने योजना बनाएको छ। सुनसरीको पर्यटकीय स्थल श्रीलंका टापुबाट सुरु हुने छायांकन यात्रा काठमाडौं, भक्तपुर र कीर्तिपुरका विभिन्न स्थानहरूमा पुगेर टुङ्गिनेछ। नवराज थापाको छायांकन रहने यस चलचित्रलाई रवि खड्का, शिवराज पौडेल र टोपेन्द्र विष्टले मिलेर निर्माण गरेका हुन्।
निर्माण टोलीले आगामी असार महिनाभित्रै सम्पूर्ण छायांकन सम्पन्न गर्ने लक्ष्य राखेको छ। चलचित्रलाई स्तरीय रूपमा सम्पादन गरी यस वर्षको दशैंको अवसरमा फूलपातीका दिनदेखि देशभरका हलहरूमा प्रदर्शन गर्ने तयारी गरिएको छ।
Discussion about this post