अस्विन दाहाल । धरानकी युवा नृत्य कलाकार इचिङ्सा लिम्बु अन्तर्राष्ट्रिय नृत्य प्रतियोगिता ‘मेरो डान्स युनिभर्स’ को उत्कृष्ट १० मा पर्न सफल भएकी छन्।
इचिङ्सा प्रतियोगिताको प्रारम्भिक चरण मा झापा, बिर्तामोडमा अडिसन दिँदै छानिएकी हुन् । इचिङ्साले विभिन्न नृत्य विधामा आफूलाई अब्बल प्रमाणित गरिरहेकि छिन् । निर्णायकहरू र दर्शकहरूको मन जित्दै आइरहेकी छन्।
सोमबार ‘मेरो डान्स युनिभर्स’मा दमदार प्रस्तुति दिँदै उनी उत्कृष्ट १० मा पुग्न सफल भएकी छिन् । प्रतियोगितामा सहभागी २५ भन्दा बढी देशका हजारौं प्रतियोगीलाई पछि पार्दै उनले यो स्थान हासिल गरेकी हुन्।
प्रतियोगितामा सुरूमा उत्कृष्ट १३ बाट भोटिङ प्रक्रिया सुरू भएको थियो, जसमा इचिङ्साले धेरै मत बटुल्दै उत्कृष्ट १० मा स्थान बनाएकी हुन्।
प्रतियोगिता अहिले काठमाडौंमा भव्य रूपमा चलिरहेको छ। इचिङ्साको प्रदर्शनले केवल धरान मात्रै होइन, नेपालकै प्रतिनिधित्व गरिरहेको छ। इचिङ्साले अन्तर्राष्ट्रिय स्तरमा नेपालको नाम चम्काइरहेकी छन्।
प्रतियोगिताको विजेताले १ करोड रुपैयाँ पुरस्कार जित्नेछ भने दोस्रो र तेस्रो हुनेले क्रमशः ७५ लाख र ५० लाख पाउने छन्।
इचिङ्सालाई भोट दिन चाहनेले ‘My Intra Foundation’ नामक एप डाउनलोड गरेर भोट गर्न सक्छन्। त्यसका साथै, मोबाइल सिमबाट MDU 03 टाइप गरी 37000 मा SMS पठाएर पनि भोट गर्न सकिनेछ ।
Discussion about this post