चलचित्र ‘किस्ने कहाँ छ ?’ निर्माण हुँदै, थिम पोस्टर सार्वजनिक

विशेष अनलाइन । कमेडी जनरामा चलचित्र ‘किस्ने कहाँ छ ?’ बन्ने भएको छ । निर्माण युनिटले चलचित्रको एक थिम पोस्टर सार्वजनिक गर्दै निर्माण घोषणा गरेको हो । पोस्टरमा एउटा गाडी हिलो बाटोमा रोकिएको देखिन्छ, जहाँ चालकले बाटोमा काम गरिरहेका व्यक्तिसँग संवाद गरिरहेको दृश्य समेटिएको छ। यसले चलचित्र ग्रामीण परिवेशमा आधारित रहेको संकेत गर्छ।

चलचित्रको कथा, पटकथा र संवाद विनयराज पौडेलले लेखेका हुन्। ग्रीन प्यारोट्स चलचित्र प्रोडक्सनको ब्यानरमा बन्ने चलचित्र हेमन्त बस्नेतको निर्माणमा तयार हुँदैछ। कार्यकारी निर्माताको रूपमा ईश्वरवल्लभ उप्रेती रहेका छन्।

निर्देशक बस्नेतका अनुसार चलचित्रको छायाङ्कन चाँडै सुरु हुनेछ भने कलाकार छनोटको प्रक्रिया हाल जारी रहेको छ। चलचित्रले नेपाली समाजका विविध पक्षहरूलाई हास्यसहित प्रस्तुत गर्ने अपेक्षा गरिएको छ। चलचित्रले दर्शकलाई मनोरञ्जनसँगै समाजको यथार्थपरक चित्रण पनि दिने निर्माण पक्षको विश्वास छ।