विशेष अनलाइन । भिम लामा फिल्म्स प्रा.लि.को ब्यानरमा निर्माण भएको चलचित्र ‘पहिचान’ (लडाई पहिचानको) को टिजर सार्वजनिक भएको छ । सार्वजनिक टिजरले कोशी प्रदेशको नामकरण विरुद्ध चलिरहेको ‘नो कोशी’ आन्दोलनको गहन कथालाई प्रस्तुत गरेको छ, जसले अहिलेको जल्दोबल्दो पहिचानको मुद्दालाई पर्दामा उतार्ने संकेत दिएको छ ।
सार्वजानिक टिजरमा, लिम्बु समुदायले आफ्नो परम्परागत कवाजको रूपमा लिने ‘सिलाम साक्मा’ अंकित झण्डाका साथ ‘लडाई पहिचानको’ नारा प्रमुखताका साथ देखाइएको छ । यसले केही समयअघि पहिचानवादी जनजातिहरूले चलाएको ‘नो कोशी’ आन्दोलनको भावनात्मक र वैचारिक पाटोलाई समेट्ने प्रष्ट पारेको छ ।टिजरले वर्तमान प्रदेश नामको विवादलाई नै मुख्य विषयवस्तु बनाएको प्रस्ट हुन्छ, जसले दर्शकहरूलाई सामाजिक र राजनीतिक बहसका लागि प्रेरित गर्ने अपेक्षा गरिएको छ ।
चलचित्रमा धिरेन शाक्य, करिश्मा मानन्धर, प्रेम सुब्बा, राजेन्द्र खड्गी, दिनेश कोइराला, सुवास तामाङ, जेनी तामाङ, रामजी बिष्ट, सुरबिर पन्डित, रोशन शर्मा ,किशोर साम्बाहाम्फे,छिरिङ लामा,शर्मिला राई, कविता देबि राई ,पबि तेम्बे,सुदिप लिम्बू,नवीन मेनेङ्बो,दिलु सुब्बा लगायतका कलाकारको अभिनय रहेको छ । मंसिर ५ गतेबाट प्रदर्शनमा आउन लागेको चलचित्रलाई भिम लामा, दिलु सुब्बा लुङवा, रामजी बिस्ट र उमेश तामाङ (रोमियो लामा) ले संयुक्त रूपमा निर्माण गरेका हुन् ।करिब १ करोडको लगानीमा निर्माण गरिएको चलचित्र को वितरण कुवेर फिल्म डिष्ट्रिब्युटर्सले गर्ने भएको छ ।
Discussion about this post