विशेष अनलाइन । देशमा उत्पन्न असहज परिस्थितिका कारण केही समय सिनेमा हलहरू बन्द भए पनि नेपाली सिनेमा ‘कोशेढुङ्गा’ को प्रदर्शनले फेरि निरन्तरता पाएको छ। सोमबारदेखि हलहरू सञ्चालनमा आएसँगै ‘कोशेढुङ्गा’ ले दोस्रो साताको उच्च अकुपेन्सीलाई कायम राख्दै दर्शकको मन जितिरहेको छ।
बहुचर्चित सिनेमा ‘पूर्णबहादुरको सारंगी’ का सफल निर्देशक सरोज पौडेलको निर्देशनमा बनेको ‘कोशेढुङ्गा’ भदौ १२ गतेदेखि प्रदर्शनमा आएको थियो। प्रदर्शनको सुरुवाती दिनदेखि नै सकारात्मक ‘वर्ड अफ माउथ’ कमाउँदै, निर्माता, निर्देशक र कलाकारहरू मोफसलका दर्शकहरूसँग भेट्न विभिन्न सहर पुगेका थिए। दर्शकबाट पाएको बलियो प्रतिक्रियाले गर्दा सिनेमाको निर्माण पक्ष उत्साहित भएको छ।
निर्देशक पौडेलले सिनेमालाई दर्शकले सुरुदेखि नै माया गरेको र अहिले पनि त्यस्तै साथ र सहयोग पाउनेमा आफू आशावादी रहेको बताए। “हाम्रो सिनेमा हेर्ने दर्शकले राम्रो भन्नुभएको छ,” उनले भने, “अब पनि दर्शकको उत्तिकै साथ र सहयोग पाउनेमा हामी आशावादी छौँ।”
निर्माता किशोर अनुरागले पनि देशका विभिन्न सहरका दर्शकले सिनेमा राम्रो भएको प्रतिक्रिया दिइरहेको अवस्थामा ठूलो संख्यामा दर्शकले सिनेमा हेर्नेमा आफूहरू विश्वस्त रहेको बताए।
नरदेवी फिल्मस्को प्रस्तुति रहेको यो सिनेमा सरोज पौडेलले नै लेखेका हुन्। सिनेमामा सुरक्षा पन्त, मञ्जिल कुमार, आर्यन सिग्देल, ऋचा शर्मा, नीति शाह, प्रवीण खतिवडा, सरोज खनाल, विशाल पहाडी, लोकमणि सापकोटा, हिउँवाला गौतमजस्ता स्थापित कलाकारहरूको अभिनय छ। यसका साथै सिर्जना अधिकारी, शेखर चापागाईं, दिनेश काफ्ले, सिरु विष्ट, स्नेहा जोशी, सुबलमणि सापकोटा, सविता रेग्मीलगायत कलाकारहरूले पनि अभिनय गरेका छन्।
प्रेविल कँडेल र किशोर अनुराग निर्माता रहेको ‘कोशेढुङ्गा’ का कार्यकारी निर्माता दिनेश खड्का हुन्। बाबु श्रेष्ठले छायांकन गरेको यस सिनेमालाई नहकुल खड्काले सम्पादन गरेका हुन्। सिनेमाका गीतहरूमा खेम सेन्चुरी, आशिष अविरल र रिदम कँडेलले संगीत दिएका छन्। सिनेमाले नेपाली दर्शकको माया निरन्तर पाउने अपेक्षा गरिएको छ।
Discussion about this post