विशेष अनलाइन । नेपाली चलचित्र ‘हरिबहादुरको जुत्ता’ ले यस वर्षको फूलपातीदेखि नेपालसँगै अमेरिकामा पनि भव्य प्रदर्शनको तयारी गरेको छ। विशेष अनलाइनका अनुसार, यो चलचित्र अमेरिकाका ८० भन्दा बढी सिनेमा हलहरूमा एकसाथ रिलिज हुने भएको छ, जुन नेपाली चलचित्रका लागि एक महत्त्वपूर्ण उपलब्धी मानिएको छ।
अमेरिकामा यो चलचित्र वितरणको जिम्मा आहाना पौडेलको चलचित्र इन्टरटेनमेन्ट एलएलसीले लिएको छ। पौडेलले जानकारी दिएअनुसार, नेपालमा रिलिज हुने मितिमै अमेरिकामा पनि ‘हरिबहादुरको जुत्ता’ प्रदर्शनमा आउनेछ।
यो चलचित्र टेक्सास, न्यूयोर्क, ओहायो, पेन्सिलभेनिया, कनेक्टिकट, न्यू ह्याम्सायर, मासाचुसेट्स, नेब्रास्का, जर्जिया, मिजौरी, विसकन्सिन, नर्थ डेकोटा, मिनेसोटा, आयोवा, मेरिल्याण्ड, वासिङ्टन डीसी, भर्जिनिया, उटाह लगायतका प्रमुख सहर र राज्यहरूमा प्रदर्शन हुनेछ। त्यहाँका प्रतिष्ठित चेन हलहरू जस्तै सिनेमार्क, सिनेपोलिस, रेगल सिनेमाज, मार्कस सिनेमाज र एप्पल सिनेमाज लगायतमा चलचित्र रिलिजको तयारी भइरहेको आहानाले बताएकी छन्।
सरोज ओली र मोहितवंश आचार्यले निर्माण गरेको यस चलचित्रलाई लोकप्रिय निर्देशक दिपेन्द्र के खनालले निर्देशन गरेका हुन्। दिपेन्द्र खनालका चलचित्रहरूले सधैँ दर्शकमाझ राम्रो छाप छाड्ने गरेका छन्।
चलचित्रमा नेपाली हास्यव्यङ्ग्यका शिखर व्यक्तित्व हरिवंश आचार्य, चर्चित गायक तथा कलाकार प्रकाश सपुत, अभिनेत्री स्वस्तिमा खड्का, प्रियङ्का कार्की, राजाराम पौडेल, किरण केसी, दिनेश काफ्ले, सिता न्यौपाने, दिव्य देव लगायतका कलाकारहरूको दमदार अभिनय रहेको छ। यसले नेपाली दर्शकका साथै विदेशमा रहेका नेपालीहरूलाई पनि आकर्षित गर्ने अपेक्षा गरिएको छ।
Discussion about this post