विशेष अनलाइन। दसैंको फूलपातीलाई विशेष अवसरका रूपमा लिँदै असोज १३ गतेबाट ‘माइतीघर’ नामक बहुप्रतिक्षित नेपाली चलचित्र प्रदर्शनमा आउँदैछ। देशभर प्रचार अभियानलाई भव्य बनाउन निर्माण पक्षले हल–हलमा आकर्षक पोस्टर र विभिन्न स्थानमा ठूला होर्डिङ बोर्डहरू टाँसेका छन्। प्रस्तुतकर्ता रोहित अधिकारीले प्रचार–प्रसारमा कुनै कसर बाँकी नराख्ने दृढता व्यक्त गरेका छन्।
यसै क्रममा, चलचित्रको शीर्ष गीत ‘वसन्त नै बस्न खोज्छ यहाँ लोलाएर’ मा आधारित राष्ट्रिय स्तरको नृत्य प्रतियोगिता सुरु गरिएको छ। सहभागिताका लागि ४० सेकेन्डदेखि २ मिनेटसम्मको भिडियो तयार गरी ओएसआर डिजिटलको इमेलमा पठाउनु पर्नेछ। पठाइएका भिडियोहरू ओएसआरको युट्युब, फेसबुक र टिकटकमा सार्वजनिक गरिने छन्। त्यसमध्ये सर्वाधिक भ्यूज पाउने र उत्कृष्ट कोरियोग्राफी प्रस्तुत गर्ने व्यक्ती वा समूहलाई ५ लाख रुपैयाँ नगद पुरस्कार प्रदान गरिनेछ। विजेताको घोषणा असोज १२ गते गरिने र सोही दिन पुरस्कार हस्तान्तरण हुने बताइएको छ।
गीतलाई भारतीय गायिका सञ्जीवनीले स्वर दिएकी छन्। मिलन तामाङको निर्देशनमा बनेको चलचित्रमा धिरज मगर, केदार घिमिरे, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, बुद्धि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरुको अभिनय रहेको छ ।
कथावस्तु चन्द्रकुमार दोङको हो भने पटकथा र संवाद रामशरण पाठकले तयार पारेका हुन्। चलचित्रमा सुशन प्रजापतिको छायांकन, सुरेन्द्र पौडेलको सम्पादन, किरण खरेल, कुमार स्याङ्बा र राम अविरलका गीत ,चन्द्रकुमार दोङ, एलिस कार्की, एसडी योगी र स्व। जयदेवको संगीत, र अष्ट महर्जनको एक्शन यसमा समावेश छन्। चलचित्रमा रविन शेरचन र धिरज तामाङको लगानी रहेको छ भने कार्यकारी निर्माता ईश्वर श्रेष्ठ र नीरज कटुवाल हुन्।
Discussion about this post