धमाधम चलचित्र हल बन्द हुदैगर्दा हल निर्माण मै व्यस्त दीपक दीपा

बिशेष अनलाइन । कोरोना भाइरसका कारण चलचित्र नगरी डामाडोल अवस्थामा छ । चलचित्र नगरी कहिले समान्य अवस्थामा फकिन्छ, यसै भन्न सक्ने अवस्था छैन । केही चलचित्रहरु छायांकनका लागि तयार भइरहेका बेला अर्कातिर तेश्रो भेरियण्टको चर्चा भइरहेको छ । जस्ले चलचित्र नगरीलाई थप नैरास्यता थपिदिएको छ । भएका केही चलचित्र घरहरु कहिले नखुल्ने गरि बन्द भइसकेका छन् । अन्य केही चलचित्र घरहरु पनि अन्द हुने अवस्थामा छन् । यसै बिच निर्देशक तथा कलाकार दीपकराज गिरी र दीपाश्री निरौला भने यस समय हल निर्माणमा व्यस्त छन् । काठमाण्डौको नयाँ बानेश्वरस्थित शंखमुल रोडमा उनीहरुले चलचित्र घर निर्माण गरिरहेका छन् ।

पहिले नै सम्पन्न गर्ने लक्ष भएको भए पनि कोरोना महामारीका कारण काम हुन नसक्दा निर्माणमा ढिलाई भएको दीपकले बताएका छन् । आउँदो चैतसम्म निर्माण सम्पन्न गरिसक्ने योजना रहेको दीपकले जानकारी दिएका छन् । निर्माणाधिन चलचित्र घरमा दीपक दीपासँगै छक्कापञ्जा टिमको लगानी रहेको बताइएको छ । करिव ९ करोड भन्दा माथि लगानीमा निर्माण हुने हलमा दुईवटा स्क्रिन रहने छन् भने चारसय सिट रहने छन् ।

“पुराना चलचित्र घरहरु धमाधम बन्द भइरहदा यसले चलचित्र नगरीलाई अतुलनिय क्षति पुर्याएको छ । ति सबैको परिपुर्ति गर्न सक्छौँ त भन्दिन, तर चलचित्र नगरीलाई केही माथि उकास्ने सहज हुने अपेक्षा भने गरेका छौँ ,” दीपक भन्छन् । चलचित्र हल निर्माण गर्ने टिमको पुरानै योजना रहेको समेत दीपकले जानकारी दिएका छन् ।

चलचित्र हलहरु धमाधम बन्द भइरहेका बेला नयाँ हल खोल्दा सकारात्मक सन्देश जाने दीपाश्री निरौलाको बुझाई छ । “चलचित्र क्षेत्रमा काम गरेर कमाएको पैसा यसै क्षेत्रमा लगानी गर्नुपर्छ भन्ने भएर चलचित्र हल निर्माणमा लागेको निरौलाले बताएकी छन् । धमाधम चलचित्र हलहरु बन्द भइरहेका समयमा हल निर्माणलाई निरन्तरता दिनुलाई सकारात्मक रुपमा हेरिएको छ । कोरोना संक्रमण कारण हालसम्म २८ वटा चलचित्र हल बन्द भइसकेका छन् ।