प्रकाश गुरुङको माया धरानेमा हर्क साम्पाङको अभिनय

विशेष अनलाइन । गायक प्रकाश गुरुङ गायन क्षेत्रमा आफ्नो नाम स्थापित गर्ने अभियानमा छन् । उनी आफूलाई ब्ल्याक डाइमण्डको नामले चिनाउन रुचाउँछन् । यस अघि उर्गेन दोङको शब्द सङ्गीतमा ‘अँगालोमा बाँधी तिमीलाई’ लगायतका गीत सार्वजनिक गरिसकेका गुरुङले ‘माया धराने’ बोलको गीत सार्वजनिक गर्ने तयारी गरेका छन् । यो गीतको शब्द तथा सङ्गीत पनि गायक गुरुङले नै गरेका हुन् ।

‘माया धराने’मा गुरुङलाई गायिका मेलिना मैनालीले साथ दिएकी छन् । काठमाण्डौको किङ स्टुडियोमा रेकर्ड भएको गीतको सम्पादन राजु कार्कीले गरेका हुन् ।

गीत ‘माया धराने’को म्युजिक भिडियोको सुटिङ सकेर हाल सम्पादनको काम भइरहेको छ । भिडियोमा गायक गुरुङ र विमला खाजुमको मुख्य भूमिका रहेको छ । भिडियोमा धरान उपमहानगरपालिकाका प्रमुख हर्क साम्पाङको पनि विशेष भूमिका रहेको छ । भिडियोमा धरानमा श्रम गर्न जाँदा माया बसेको कुरालाई देखाउन खोजिएको गायक गुरुङले जानकारी दिए । भिडियोले धरानमा लगाएको माया चोखो हुन्छ  भन्ने देखाउने छ ।

‘माया धराने’को म्युजिक भिडियोलाई निर्देशक भीम लामाले निर्देशन गरेका हुन् । नृत्य निर्देशन भने नगेन्द्र राईले गरेका छन् । सुमन तामाङले छायाङ्कन गरेको भिडियोको सम्पादन हेमन तामाङले गरिरहेका छन् । भिडियोलाई १० गते शनिवार ओएसआर डिजिटल युट्युब च्यानलबाट सार्वजनिक गरिने बताइएको छ ।