कस्ले जित्ला ‘कमेडी च्याम्पियन २’को उपाधी ?

बिशेष अनलाइन । नेपालको पहिलो कमेडी रियालिटी शो ‘कमेडी च्याम्पियन २’को उपाधी कस्ले जित्ला ? यो कमेडी च्याम्पियन हेर्ने दर्शकका लागि चासो र कौतुहलताको विषय हो । ‘कमेडी च्याम्पियन २’ हजारौ प्रतिस्पर्धीहरुलाई पन्छाउदै अहिले शो मा उत्कृष्ट ६ प्रतिस्पर्धी छन् । यो अवस्थामा जो कोहीले पनि उपाधी कब्जा गर्न सक्छ । हालसम्मको प्रस्तुती हेर्दा अधिकांश दर्शकले उत्कृष्ट ६ मध्यबाट ताप्लेजुङका भरतमणि पौडेल र सिक्किमका विक्की अग्रवाललाई उपाधी दाबेदारका मुख्य प्रतिष्पर्धीका रुपमा हेरिएको छ ।

कतिपयले त भरतमणिले उपाधी पाउनका लागि विक्की ‘कमेडी च्याम्पियन’बाट आउट हुनुपर्ने अभिव्यक्ती समेत दिने गरेका छन् । त्यसो त सिजन १ मा पनि प्रतिस्पर्धामा आएका सोलुखुम्बुका कैलाश कार्कीलाई पनि उपाधी दाबेदारका रुपमा हेरिएको छ । त्यसमा पनि भरतमणि र विक्कीका लागि भने सरकारी स्तरबाट समेत आर्थिक सहयोग भएको छ ।

नेकपा एमालेका युवा नेता तथा पूर्व पर्यटनमन्त्री योगेश भट्टराईले समेत उनलाई भोटका सर्वसाधारणसँग अपिल गरेका छन् । पौडेलका लागि ६ लाख रुपैयाँको पुरस्कार राशी नै घोषणा गरिएको थियो । हरेक हप्ताको प्रस्तुतीले पनि भरतमणि ताप्लेजुङबासीको मात्र नभइ देश तथा विदेशमा रहेका नेपालीहरुको मन जित्न सफल भएका छन् । उनी हरेक हप्ता दर्शकलाई पेट मिचिमिचि हसाउन सफल भएका छन् ।

यता विक्की अग्रवाल पनि भरतमणि भन्दा कम भने छैनन् । विक्कीलाई ‘कमेडी च्याम्पियन’का अन्य प्रतिस्पर्धी भन्दा फरक शैलीको कमेडी गरेर हसाउन सक्ने क्षमता भएका कमेडीयनका रुपमा चर्चा हुने गरेको छ । कतिपय अवस्थामा त विक्कीको जोक्स निर्णायकले समेत बुझ्न धौ धौ हुने गरेको छ ।

विक्कीलाई ‘कमेडी च्याम्पियन’को उपाधी दिलाउन सिक्किमका मुख्य मन्त्री पीएस गोलेले ५ लाख अर्थिक सहयोग समेत गरेका थिए भने अहिले उनलाई जिताउनका लागि सिक्किममा अभियान नै चलेको छ ।