गोल्ड कपका लागि निर्माता ज्योतिराज राईद्वारा सुन र चाँदी जडित ट्रफी प्रदान

मनोज दाहाल । चलचित्र निर्माता ज्योतिराज राईले ‘सातौँ बेलबारी आरजु राईस अन्तर्राष्ट्रिय आमन्त्रण गोल्ड कप’का लागि रनिङ ट्रफी प्रदान गरेका छन् । नेपाल चलचित्र विकास बोर्ड अन्तर्गत आदिवासी जनजाति मातृ भाषी चलचित्र प्रवर्द्धन समितिका संयोजक समेत रहेका राईले आफ्ना स्व। बुवा मेजर एन। बि। रुङमाहाङ राईको स्मृतिमा उक्त ट्रफी हस्तान्तरण गरेका हुन् ।

मोरङको बेलबारी नगरपालिकामा आयोजित पत्रकार सम्मेलनमा उक्त ट्रफी सार्वजनिक सहित आयोजक एल एक्स सिटी फुटबल क्लबका अध्यक्ष विक्रम बान्तवा राई र बेलबारी नगरपालिकाका नगर प्रमुख दिल प्रसाद राईलाई हस्तान्तरण गरिएको थियो ।

आफूसँगै परिवारका सदस्य पोपिराज राई, पवित्रा राई, सरला राई र नानु राईको तर्फबाट उक्त ट्रफी सौजन्य गरिएको निर्माता राईले जानकारी दिए । निर्माता राईका अनुसार करिब ८ लाख रुपैयाँमा तयार भएको ट्रफीमा २ तोला सुन र २ किलो ५ सय ग्राम चाँदी जडित रहेको छ ।

‘अन्तर्राष्ट्रिय आमन्त्रण गोल्ड कप’मा तीन पटक लगातार विजेता बन्ने टोलीलाई सो समयमा घोषित पुरस्कार रकम सहित उक्त ट्रफी प्रदान गरिने छ । कुनै टिमले नजितुन्जेल ट्रफी नगरपालिकाको कार्यालयमा नै रहने छ ।   २०४८र४९ सालमा आफ्ना बुवाको नाममा नकआउट फुटबल खेलको आयोजना गरेको स्मरण गर्दै त्यसलाई पूर्णता दिन नसकिरहेको अवस्थामा पुन खेलमा संलग्न हुन पाउनु आफ्नो र परिवारको लागि ऐतिहासिक क्षण भएको उल्लेख गरे ।  ‘म हुर्की खेली गरेको आफ्नो जन्मथलोमा योगदान गर्न पाउँदा गर्वको अनुभूति भएको छ’,निर्माता राईले भने ।

‘सातौँ बेलबारी आरजु राईस अन्तर्राष्ट्रिय आमन्त्रण गोल्ड कप’ मोरङको बेलबारी नगरपालिका ११ लक्ष्मी खेल मैदान, लक्ष्मी मार्गमा असोज ११ गतेदेखि असोज १९ गतेसम्म संचालन हुनेछ । प्रतियोगितामा झापा ११ फुटबल क्लब झापा, भोजपुर डी फुटबल क्लब भोजपुर, सलहेश युवा क्लब सिराहा, रारा फुटबल क्लब धनकुटा, चित्लाङ फुटबल क्लब काठमाडौँ,बिग्रेड ब्वइज क्लब काठमाडौँ, दलसिंहपारा स्पोर्टस एकेडेमी भारत, बुटवल लुम्बिनी फुटबल क्लब बुटवल, नेपाल पुलिस क्लब काठमाडौँ र आयोजक एल एक्स सिटी फुटबल क्लब लक्ष्मी मार्ग गरी जम्मा १० टोली सहभागी रहने छन् ।