नीना गुप्ताले खोलिन् नीजि जीवनको राज : भनिन्, ‘मेरा पिता नै मेरा प्रेमी थिए’

बलिउडकी दिग्गज अभिनेत्री नीना गुप्ताले आफ्नो अभिनयका कारण त चर्चा बटुल्ने गर्छिन् नै उनी आफ्नो बिन्दाज व्यक्तित्वका कारण पनि परिचित छिन् । नीना हरेक मुद्दामा खुल्ला रुपमा आफ्नो विचार राख्ने गर्छिन् । जसमा विशेषगरी विवाह, करियर, बच्चा र महिलाको अधिकारजस्ता मुद्दा समावेश छन् ।

आजको समयमा केही कुरा अहिले पनि समाजका लागि निकै आधुनिक मानिन्छ, त्यो नीनाका लागि साधारण कुरा हो । नीना त्यहि कुरा गर्ने गर्छिन् जुन उनलाई मनपर्छ, जुन उनलाई सही लाग्छ । यसका साथै नीना आफ्नो नीजि जीवनका कारण पनि लाइमलाइटको हिस्सा बन्ने गर्छिन् । नीना धेरैजसो आफ्नो जीवनसँग सम्बन्धित महत्वपूर्ण खुलासा गरिरहन्छिन् । हालै नीना फिल्म ‘सरदारका ग्रान्डसन ’ मा देखिएकी छिन् जसमा उनको भूमिकाको व्यापक तारिफ भइरहेको छ । त्यसपछि त नीना एकपछि अर्को अन्तरवार्ता दिइरहेकी छिन् । यस्तै एक अन्तरवार्तामा उनले आफ्नो एक्लोपनको विषयमा एउटा ठूलो खुलासा गरेकी छिन् ।

नीना गुप्ताले रेडियो जकी सिद्धार्थ कन्नडलाई दिएको आफ्नो अन्तरवार्तामा आफ्नो एक्लोपनको संघर्षबारे कुरा गर्दै उनले आफ्नो जीवनको धेरैजसो समय एक्लोपनमा बिताएको बताएकी छिन् । उनका कोही श्रीमान् वा प्रेमी नभएका कारण थुप्रै वर्षसम्म यस्तो चिजको सामना गर्नुपरेको उनले बताइन् । साथै आफूले अतितमा ध्यान नदिएका कारण आफू एक्लोपनबाट टाढा रहन सफल भएको उनले बताएकी छिन् ।

यो अन्तरवार्तामा नीनाले आफ्नो फिल्मबाहेक नीजि जीवनको विषयमा थुप्रै मुद्दामाथि खुलेर कुरा गरेकी छिन् । नीनाले आफ्नो जीवनमा एक्लोपनबारे कुरा गर्दै भनिन्, ‘यो मेरो पूरा जीवनमा थुप्रै पटक भयो । किनभने थुप्रै वर्षसम्म न त मेरो कोही श्रीमान् थिए न प्रेमी नै । साँचो कुरा गर्नुपर्दा मेरा पिता नै मेरा प्रेमी थिए । मलाई काममा अपमानित गर्दा पनि म एक्लो महसुस गर्थेँ । मैले आफ्नो जीवनमा धेरैजसो एक्लो भएको महसुस गरेँ तर भगवानले मलाई शक्ति दिनुभएको छ र म सधैं अघि बढ्न सक्षम छु । म अतितलाई ध्यानै दिन्नँ ।’

स्मरण रहोस्, नीना वेस्टइन्डिजका क्रिकेटर विवियन रिचर्डस्सँग सम्बन्धमा थिइन् । यी दुईका छोरी मसाबा गुप्ता छन् । यद्यपि, विवियन र नीनाको सम्बन्ध धेरै लामोसम्म चलेन र ब्रेकअप भएको थियो । त्यसपछि नीनाले विवेक मेहरासँग विवाह गरेकी छिन् ।