विशेष अनलाइन । लोकप्रिय अभिनेता तथा गायक प्रकाश सपूत यतिबेला दुईवटा विशेष कारणले चर्चामा छन्। एकातिर उनले राष्ट्रिय स्वतन्त्र पार्टी (रास्वपा) मार्फत आफ्नो राजनीतिक यात्रा सुरु गरेका छन् भने अर्कोतिर उनले अभिनय गरेको नयाँ चलचित्र ‘परालको आगो’ को टिजर सार्वजनिक भएको छ। रास्वपाको समानुपातिक सूचीमा दलित पुरुष क्लस्टरको दोस्रो नम्बरमा रहेका सपूत, पार्टीले प्राप्त गरेको उत्साहजनक मतका कारण सांसद बन्ने करिब निश्चित भइसकेको छ।
राजनीतिक चर्चाकै बीच सोमबार सार्वजनिक गरिएको ‘परालको आगो’ को टिजरमा प्रकाश सपूतलाई रिसाहा श्रीमान्को भूमिकामा देख्न सकिन्छ। ग्रामीण लोककथाका प्रणेता गुरुप्रसाद मैनालीको चर्चित कथाबाट प्रेरित यस चलचित्रले श्रीमान् र श्रीमती (चामे र गौँथली) बीचको झगडालाई मुख्य विषयवस्तु बनाएको छ। टिजरमा प्रकाशको श्रीमतीको भूमिकामा अभिनेत्री सुहाना थापा देखिएकी छन् भने अभिनेता सौगात मल्लको पनि महत्वपूर्ण उपस्थिति रहेको छ।
लक्ष्मण सुनारको निर्देशनमा तयार भएको यस चलचित्रमा सौगात, प्रकाश र सुहानाका साथै सिर्जना अधिकारी, किशोर भण्डारी, ज्याक श्रेष्ठ लगायतका कलाकारहरूको अभिनय रहेको छ। हरिओम सिने मेकर्सको ब्यानरमा सुशील पोखरेलले निर्माण गरेको यस चलचित्रको लेखन सुशील देवकोटाले गरेका हुन्। चलचित्रले नेपाली समाजको मौलिक परिवेश र दाम्पत्य जीवनको उतारचढावलाई पर्दामा उतार्ने प्रयास गरेको छ।
आगामी वैशाख ११ गतेदेखि प्रदर्शनमा आउन लागेको यस चलचित्रमा संकल्प भुजेलको छायाङ्कन र मिलन श्रेष्ठको सम्पादन रहेको छ। सङ्गीततर्फ शान्ती ठटाल, सत्य-स्वरुप र स्वयम् प्रकाश सपूतको सृजना सुन्न पाइनेछ। राजनीतिक मैदानमा सफल देखिएका प्रकाश सपूतका लागि यो चलचित्र व्यावसायिक रूपमा पनि निकै महत्त्वपूर्ण मानिएको छ।
Discussion about this post