विशेष अनलाइन । नेपाली चलचित्र क्षेत्रमा पछिल्लो समय व्यावसायिकताको नयाँ लहर देखिएको छ। छायांकन स्थलमा पुग्नुअघि नै कलाकार र प्राविधिकबीच समन्वय बढाउन ‘वर्कसप’ (कार्यशाला) गर्ने संस्कृति फस्टाउँदै गएको छ। यसैक्रममा, निर्माणको तयारीमा रहेको बहुप्रतिक्षित चलचित्र ‘मितज्यू’ ले पनि आफ्नो औपचारिक वर्कसप सुरु गरेको छ।
शनिबारदेखि काठमाडौंमा सुरु भएको यस वर्कसपमा चलचित्रका निर्देशक, कलाकार र निर्माण टोलीको बाक्लो उपस्थिति रहेको छ। विशेषगरी कलाकारहरूलाई आफ्नो चरित्र (क्यारेक्टर) मा भिज्न र पटकथाको गहिराइ बुझ्न मद्दत पुगोस् भन्ने उद्देश्यले यो अभ्यास थालिएको हो।
वर्कसपमा अहिले कलाकारहरू तेरिया मगर, पुस्कर गुरुङ, सुवर्ण थापा, अनु थापा र स्मिता लामिछाने लगायतले आफ्नो भूमिकामाथि अभ्यास गरिरहेका छन्। चलचित्रमा दयाहाङ राई, सौगात मल्ल, शिशिर वाङ्देल, अरुण पुन मगर, उत्तम राज पाण्डे र खड्क बहादुर पुन (खबपु) जस्ता स्थापित कलाकारहरूको समेत सशक्त अभिनय रहनेछ।
चलचित्रका निर्माता जनक घर्ती मगरका अनुसार सुटिङ सेटमा हुनसक्ने समय र खर्चको खेर फाँटलाई कम गर्न वर्कसप प्रभावकारी माध्यम हो। उनले भने: “कलाकारले छायांकनमा जानुअघि नै आफ्नो चरित्र र संवादको मर्म बुझ्न सकेमा सुटिङ सहज र व्यवस्थित हुन्छ। गुणस्तरीय चलचित्र निर्माणका लागि हामीले यो पूर्वतयारीलाई प्राथमिकता दिएका हौँ।”
अनिल बुढा मगरको निर्देशनमा बन्न लागेको यस चलचित्रको छायांकन आगामी माघको पहिलो सातादेखि रोल्पाका रमणीय भूगोलमा सुरु हुनेछ। चलचित्रलाई शिशिर शिशङखेले छायांकन गर्नेछन् भने सम्पादनको जिम्मेवारी लोकश बज्रचार्यले सम्हालेका छन्।निर्माण टोलीले ‘मितज्यू’लाई आगामी वर्षको जेठ १५ गते दर्शकमाझ ल्याउने लक्ष्य राखेको छ।
Discussion about this post