विशेष अनलाइन । चलचित्र ‘अभिमन्यु : च्याप्टर–१’ को भव्य प्रिमियर सोमबार साँझ ललितपुरस्थित लविम महलको क्यूएफएक्स हलमा गरिएको छ । प्रिमियरमा चलचित्रकर्मी, चलचित्र युनिटका सदस्यहरू र सञ्चारकर्मीहरूको बाक्लो उपस्थिति रहेको थियो। चलचित्रको पहिलो प्रदर्शनीलाई लिएर उपस्थित सबैमा ठूलो उत्साह देखिएको थियो ।
चलचित्र हेरेपछि अधिकांश दर्शकले यसलाई ‘उत्कृष्ट’ प्रतिक्रिया दिए भने केहीले ‘ठिकै’ रहेको बताए। धेरैले कलाकारहरूको ‘अब्बल अभिनय’ र ‘उत्कृष्ट कथावस्तु’ को प्रशंसा गरे। दर्शकहरूले चलचित्रको सस्पेन्स थ्रिलर ड्रामालाई विशेष रूपमा रुचाएका थिए, जसले उनीहरूलाई अन्तिमसम्म बाँधेर राखेको थियो।
प्रिमियरमा निर्देशक शोभित बस्नेत, अभिनेता दिब्यदेव पन्त, कमेडियन भरतमणि अधिकारी, अभिनेत्री सरिता गिरी लगायतका महत्त्वपूर्ण व्यक्तिहरूको उपस्थिति रहेको थियो। उनीहरूले चलचित्र हेरेपछि आ-आफ्नो प्रतिक्रिया दिएका थिए।
अभिनेता दिव्यदेव पन्त ले चलचित्रको कथावस्तु, निर्देशन र कलाकारहरूको काम अब्बल रहेको बताए। उनले विशेषगरी चलचित्रमा महिला पात्रलाई प्रस्तुत गर्ने परम्परागत शैलीलाई यसले तोडेको भन्दै प्रशंसा गरे। निर्देशक शोभित बस्नेत ले पनि अहिले कलाकारहरूका चलचित्र चल्ने समय आएको बताउँदै ‘अभिमन्यु : च्याप्टर–१’ कलाकारहरूको अभिनयका कारण सफल हुने विश्वास व्यक्त गरे।
कमेडीयन भरतमणि पौडेल ले चलचित्रले दाइजो प्रथा जस्तो गम्भीर सामाजिक विषयवस्तुलाई उठाएको र यसमा बलियो सस्पेन्स थ्रिलर ड्रामा समावेश गरिएको प्रतिक्रिया दिए। उनले चलचित्र हेरेर दर्शकले सामाजिक सन्देशसहित मनोरञ्जन पनि पाउने बताए।
प्रिमियरपछि चलचित्रका मुख्य अभिनेता कामेश्वर चौरसिया मिडियासामु निकै भावुक देखिए। करिब दुई दशक चलचित्र क्षेत्रमा बिताएका उनले बल्ल यस चलचित्रमार्फत मुख्य भूमिका निर्वाह गर्न पाएका हुन्। आफ्नो लामो सङ्घर्षलाई स्मरण गर्दै उनले भने, “कलाकार बन्नको लागि स्क्रिप्ट नै चाहिदो रहेछ… जे गरेँ, यहाँ आइपुग्नकै लागि रहेछ।”
सुशान्त गौतमले निर्देशन गरेको र मुकेश खनालले लेखेको यो चलचित्र नेपाली र हिन्दी गरी दुई भाषामा स्वदेश तथा विदेशमा रिलिज हुँदैछ। कामेश्वर चौरसिया सँगै सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देललगायतका कलाकारको मुख्य भूमिका रहेको यो चलचित्र आगामी बिहीबार (१८ गते) बाट विश्वव्यापी प्रदर्शनमा आउँदैछ।
Discussion about this post