विशेष अनलाइन । बहुप्रतिक्षित चलचित्र ‘परालको आगो’ को सम्पूर्ण छायाङ्कन ४० दिनको निर्धारित समयभित्रै सफलतापूर्वक सम्पन्न भएको छ। निर्माण पक्षले गत दसैँअघिदेखि म्याग्दीका रमणीय स्थानहरूमा छायाङ्कन सुरु गरेको थियो, जसको औपचारिक समाप्ति मंगलबार गरिएको हो। सम्पूर्ण प्राविधिक टोली र निर्देशकको लगनशील खटाइका कारण जेनजी आन्दोलनका कारण सिर्जित केही अवरोधका बाबजुद पनि काम तोकिएको समयमै सकिएको निर्माताले जानकारी दिएका छन्।
छायाङ्कन सकिएलगत्तै निर्माण टोलीले दर्शकमाझ चलचित्रका मुख्य कलाकारहरूको तीन फरक-फरक लुक्सका तस्बिरहरू सार्वजनिक गरेको छ। यससँगै, चलचित्रको प्रदर्शन मिति पनि घोषणा गरिएको छ। निर्माता सुशील पोखरेलका अनुसार, यो चलचित्र आगामी बैशाख ११ गते देखि देशव्यापी प्रदर्शनमा आउनेछ। यससँगै, चलचित्रका चारवटा गीतहरूको छायाङ्कन पनि पुरा भएको उनले बताएका छन्।
यो चलचित्र नेपाली साहित्यका धरोहर गुरुप्रसाद मैनालीको चर्चित कथामा आधारित छ। यसको लेखन सुशील देवकोटाले गरेका हुन् भने चलचित्रलाइ लक्ष्मण सुनारले निर्देशन गरेका छन् । चलचित्रमा कलाकारहरूको सशक्त उपस्थिति रहेको छ। मुख्य भूमिकाहरूमा सौगात मल्ल, प्रकाश सपुत, र सुहाना थापा रहेका छन्।
‘परालको आगो’ मा यी तीन कलाकारबाहेक सिर्जना अधिकारी, शंकर आचार्य, किशोर भण्डारी, कुलदीप अधिकारी, सरिता भण्डारी, र रेणु न्यौपाने लगायतका स्थापित कलाकारहरूको पनि अभिनय रहेको छ। साथै, बालकलाकार एन्जिला बाँनियाको अभिनय पनि चलचित्रमा देख्न पाइनेछ। प्रदर्शन मिति नजिकिँदै गर्दा चलचित्रको प्रचारप्रसार सामग्रीहरू क्रमशः सार्वजनिक गर्दै जाने योजनामा निर्माण टोली रहेको छ।
Discussion about this post