विशेष अनलाइन । चलचित्र ‘अभिमन्यु’को हिन्दी संस्करणको टिजर सार्वजनिक भएको छ, जसले दर्शकहरूमाझ ठूलो कौतुहल जगाएको छ। १ मिनेट ४० सेकेन्ड लामो यो टिजरले चलचित्रको सस्पेन्स-थ्रिलर कथावस्तुलाई सशक्त रूपमा प्रस्तुत गरेको छ। कथामा प्रेम, रहस्य, अपराध, र मनोवैज्ञानिक द्वन्द्वलाई मुख्य विषयवस्तु बनाइएको छ। पैसाको लागि गरिएको अपहरणको योजना र त्यसको छानबिनमा जुटेको प्रहरीको अनुसन्धानलाई टिजरको केन्द्रमा राखिएको छ ।
टिजरको अर्को महत्त्वपूर्ण पक्ष यसको हिन्दी स्वरांकन हो, जुन निकै प्रभावशाली बनेको छ। अभिनेता कामेश्वर चौरासियाले निभाएको मुख्य पात्रलाई सुपरहिट चलचित्र ‘केजीएफ’को हिन्दी भर्सनमा आवाज दिने चर्चित भ्वाइस आर्टिस्ट सचिन गोलेले आफ्नो दमदार आवाज दिएका छन्। स्वरांकनको क्रममा गोलेले निर्माण टिमको मिहिनेतको प्रशंसा गर्दै चलचित्र उत्कृष्ट बनेको विश्वास व्यक्त गरेका थिए, जसले हिन्दी भाषी दर्शकहरूलाई पनि ‘अभिमन्यु’ प्रति आकर्षित गर्ने अपेक्षा गरिएको छ।
चलचित्र ‘अभिमन्यु’ आगामी मंसिर १८ गतेबाट नेपाली र हिन्दी गरी दुवै भर्सनमा एकैसाथ प्रदर्शनमा आउँदैछ। यसमा कामेश्वर चौरासियासँगै लक्ष्मी बर्देवा, शिशिर वाङ्देल, सरिता गिरी, गौमाया गुरुङ, किरण श्रेष्ठ लगायतका कलाकारहरूको अभिनय रहेको छ। यो चलचित्र संगीतकारको रूपमा ख्याति कमाएका सुशान्त गौतमको निर्देशनमा बनेको हो। चलचित्रको पटकथा मुकेश खनालले लेखेका हुन् भने छायांकन शरद महतोले गरेका हुन् ।
चलचित्रका निर्माता विनोद पौडेल र गुञ्जन गिरी हुन्। निर्माता विनोद पौडेलको अघिल्लो चलचित्र ‘पूर्णबहादुरको सारङ्गी’ले बक्स अफिसमा ऐतिहासिक कीर्तिमान बनाएको थियो। रमेश चौलागाईं र हरि श्रेष्ठ सह-निर्माताको रूपमा रहेका छ्न् । चलचित्रमा मनोज श्रेष्ठको भिएफएक्स, जुनिम गहतराजको रंग संयोजन, र मदन घिमिरेको सम्पादन रहेको छ ।
Discussion about this post