विशेष अनलाइन । मङ्सिर १८ गते बाट प्रदर्शनमा आउन लागेको नेपाली चलचित्र ‘अभिमन्यु’ च्याप्टर–१’ को नयाँ गीत ‘मरौ ज्यानले’ सार्वजनिक भएलगत्तै चर्चामा आएको छ। सार्वजनिक भएको चार दिनमै यो गीतको भिडियोले ५ लाख ६ हजार भन्दा बढी भ्युज पाउन सफल भएको छ। छोटो समयमै यति ठूलो संख्यामा भ्युज आउनुले चलचित्रको संगीत पक्षको बलियोपन र दर्शकको सकारात्मक प्रतिक्रिया स्पष्ट पार्छ। यो सफलताले आगामी दिनमा चलचित्रप्रतिको उत्साह अझै बढाउने अपेक्षा गरिएको छ।
गीत ‘मरौ ज्यानले’ को भावनात्मक विषयवस्तु निकै गहन रहेको छ। प्रेममा छटपटिएको एक प्रेमीले प्रेमिकाको सम्झनामा जीवन समाप्त गर्न पनि नसकेको र चयनले बाँच्न पनि नसकेको थिममा यो गीत तयार भएको छ। सँगै जिउने कसम खाएको प्रेम बीचमै टुट्दाको मर्मस्पर्शी छटपटी यसको केन्द्रबिन्दुमा छ। गीतमा सुशान्त गौतमको स्वर तथा संगीत रहेको छ भने सुरेश बादलले शब्द दिएका छन्।
गीतको भिडियोमा चलचित्रका मुख्य दुई पात्र कालेश्वर चौरसिया र लक्ष्मी बर्देवा लाई प्रस्तुत गरिएको छ। उनीहरूको अभिनयले गीतको भावनालाई जीवन्त बनाएको छ। चलचित्रका फुटेजहरूलाई नै समावेश गरेर तयार पारिएको यस भिडियोमा नेपालको तराई,मधेश क्षेत्रको सुन्दर दृश्यांकन देख्न सकिन्छ। यी दृश्यहरूले गीतको भावनात्मक कथावस्तुलाई भौगोलिक सुन्दरता सँग जोड्ने काम गरेका छन्। चलचित्रमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा लगायतका कलाकारहरूको मुख्य भूमिका रहेको छ।
सुशान्त गौतम निर्देशित चलचित्रका निर्माता विनोद पौडेल र गुञ्जन गिरी हुन्। रमेश चौलागाईं र हरि श्रेष्ठ सह–निर्माता रहेको चलचित्रमा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ कार्यकारी निर्माताको रूपमा रहेका छन्।
Discussion about this post