विशेष अनलाइन । बहुप्रतिक्षित चलचित्र ‘द ब्लू लाइट’ को प्रदर्शन मिति घोषणासँगै दर्शकमाझ उत्सुकता बढाएको छ । आगामी पुस १० गतेबाट रिलिजमा आउने भएको छ । यो साइकोलोजिकल थ्रिलरले आफ्नो पोस्टर सार्वजनिक गरेपछि सिनेमाप्रेमीहरूमा यसको कथावस्तुबारे बहस सुरु भएको छ। पोस्टरमा देखिएको पाँच मुख्य पात्रहरूमाझको गहन नैराश्यता र मौन तनाव ले चलचित्रको थ्रिलर जनरालाई पुष्टि गरेको देखिन्छ ।
सार्वजनिक पोस्टरमा अभिनेता महेश त्रिपाठी, अर्पण थापा, आयुशमान देशराज जोशी, बेनिशा हमाल र सृष्टि श्रेष्ठ लाई देख्न सकिन्छ । निर्देशक बलिराम चौहान को यो प्रस्तुतिले तनावको अवस्थामा मौनता लाई मुख्य विषयवस्तु बनाएको देखिन्छ । पाँच पात्रको अनुहारमा छरिएको तनावको अज्ञात कारण ले पोस्टरलाई झनै रहस्यमय बनाएको छ ।द ब्लू लाइट’ मा यी मुख्य कलाकारसँगै सुरक्षा इटानी र बालकलाकारहरू ग्रिसमा कटुवाल र सहारा शर्मा पनि महत्त्वपूर्ण भूमिका रहेको छ ।
स्काइफल पिक्चर्स को प्रस्तुति रहेको र रमन ग्रे को को–प्रोडुसरको रूपमा संलग्नता रहेको यस चलचित्रको छायाङ्कन नरेन्द्र मैनाली ले गरेका हुन् । पुस १० मा प्रदर्शन हुने ‘द ब्लू लाइट’ ले नेपाली चलचित्र क्षेत्रमा एउटा नवीन र गहन साइकोलोजिकल थ्रिलर को अनुभव दिने अपेक्षा गरिएको छ, जहाँ निराशा र मौनताको पछाडि लुकेको सत्यलाई पर्दाफास गरिनेछ ।
Discussion about this post