विशेष अनलाइन । नेपाली कथानक चलचित्रको सर्वाधिक सफल फ्रेन्चाइज ‘कबड्डी’ को पाँचौँ संस्करणको छायाङ्कन यतिबेला मुस्ताङको थासाङ गाउँपालिकास्थित थाक सात सय क्षेत्रमा तीव्र गतिमा भइरहेको छ। बाँसुरी फिल्मस्को ब्यानरमा निर्माण भइरहेको यो चलचित्रले मुस्ताङको थकाली कला, संस्कृति, रहनसहन, परम्परा, वेशभूषा र सामाजिक चरित्रलाई मुख्य कथावस्तुमा समेटेको निर्माता कम्पनीले जनाएको छ।
निर्माता मणिराम पोखरेलका अनुसार, यसअघिका लगातार चार संस्करण पनि सोही स्थानमा छायाङ्कन भएकाले थकाली कथावस्तुको मौलिकता र स्थानीय समुदायको प्रेमले गर्दा पाँचौँ संस्करणको छायाङ्कनलाई पनि यही क्षेत्रमा निरन्तरता दिइएको हो। गत असोज २६ गते मुक्तिनाथ मन्दिरमा शुभारम्भ गरिएपछि ‘कबड्डी ५’ को छायाङ्कन थासाङका कोवाङ, नाउरीकोट, लार्जुङ र टुकुचेलगायत स्थानमा भइरहेको छ।
रामबाबु गुरुङको निर्देशन रहेको यस चलचित्रको कथावस्तुमा थकाली संस्कृतिमा आधारित ‘काजी’ को जीवनमा आइपर्ने आरोहअवरोहलाई विशेष महत्त्व दिइएको सहनिर्देशक सोमनाथ खनालले जानकारी दिए। चलचित्रका मुख्य पात्र दयाहाङ राई काजीको भूमिकामा रहेका छन्, भने नायकको भूमिकामा वीरकाजी शेरचन रहेका छन्।
‘कबड्डी ५’ मा पुराना कलाकारहरूका साथै केही नयाँ कलाकारहरूको पनि संग्लनता रहेको छ। चलचित्रमा दयाहाङ राईका साथै बुद्धि तामाङ, विजय बराल, रेश्मा गुरुङ (मैयाँ), अरुणा कार्की, कमलमणि नेपाल, विपिन कार्की, पुस्कर गुरुङ, कविता आले, सृजना गुरुङ, शिशिर वाङ्देल, विष्णु मोक्तान र प्रमिला राई लगायतका कलाकारहरूको अभिनय रहनेछ।
निर्देशक रामबाबु गुरुङ र निर्माता पोखरेलका अनुसार, लगातारको छायाङ्कनका कारण मुस्ताङको यो क्षेत्र चलचित्रकर्मीका लागि ‘आफ्नै परिवार’ जस्तै बनिसकेको छ। सुरुवाती चरणभन्दा कबड्डी ५ सम्म आइपुग्दा सडक यातायात सहज हुनु र झन्डै १०० भन्दा बढी जनशक्ति परिचालन हुँदा पनि स्थानीय समुदायले गरेको मायाप्रेम र स्नेहले छायाङ्कन कार्यमा निकै सहजता आएको छ।
काजीकी आमाको भूमिकामा रहेकी कलाकार अरुणा कार्कीले मुस्ताङमा कबड्डीको निरन्तर छायाङ्कन हुनुलाई दर्शकको माया र यहाँका समुदायको विश्वासको प्रतिफल बताएकी छन्। यस्तै, मैयाँको भूमिकामा रहेकी रेश्मा गुरुङले यहाँको नाउरीकोटमा ‘मैयाँको होटल’ भनेर परिचित हुनुमा गर्व व्यक्त गर्दै यो फ्रेन्चाइजले पर्यटन प्रवर्द्धनमा समेत महत्त्वपूर्ण योगदान पुर्याएको बताएकी छिन्।
Discussion about this post