विशेष अनलाइन । अभिनेत्री रेखा थापाको होम प्रोडक्सनमा बन्ने नयाँ चलचित्र ‘३६को आँकडा’ को पहिलो पोस्टर सार्वजनिक गरिएको छ। पोस्टरमा मुख्य पात्रका रूपमा रेखा थापा र पूजा शर्मा देखिएका छन्।
पोस्टरमा प्रहरी अधिकृतको भूमिकामा रहेकी रेखाले पूजा शर्मालाई हतकडी लगाएर नियन्त्रणमा लिएको दृश्य देखिन्छ। रेखाको अनुहारमा संघर्षपश्चातको विजयको भाव झल्किएको छ भने पूजाको अनुहारमा अझै टक्कर दिने मनोवृत्ति प्रस्ट देखिन्छ। यसले फिल्मको मुख्य केन्द्र दुई महिला पात्रबीचको द्वन्द्व हुने संकेत दिएको छ।
सबिर श्रेष्ठको निर्देशनमा बन्न लागेको चलचित्र आगामी सोमबारबाट छायांकन सुरु हुने निर्माण पक्षले जनाएको छ। सुटिङपछि मात्र अन्य कलाकार र प्राविधिक टिमबारे विवरण सार्वजनिक गर्ने तयारी गरिएको छ।
यस चलचित्रमा रेखासँग महेश त्रिपाठीको जोडी बाँधिनेछ भने पूजासँग पुष्प खड्का स्क्रीन सेयर गर्नेछन्। फ्लोरमा जानु अघि नै आएको फस्ट लुकले दर्शकमा चलचित्रप्रति उत्सुकता बढाएको छ।
Discussion about this post