विशेष अनलाइन । गत शुक्रबारदेखि देशभर प्रदर्शनमा आएको नेपाली चलचित्र ‘रियाल रिङ्गेट’ सोमबारदेखि हलहरूबाट हटाइने भएको छ। निर्माता रेबेल फिल्म्स प्रा.लि.ले आइतबार विज्ञप्ति जारी गर्दै शो विभाजनमा गरिएको बेवास्ताका कारण प्रदर्शन स्थगित गर्ने निर्णय सार्वजनिक गरेको हो।
निर्माण पक्षले चलचित्रलाई दर्शकबाट सकारात्मक प्रतिक्रिया आएको दाबी गर्दै पनि देशभरका हलले उचित समय र शो नदिएको गुनासो गरेको छ। “हामीले बारम्बार हल सञ्चालकसँग संवाद गर्दा पनि उपयुक्त शो सुनिश्चित नभएकोले बाध्यतावश प्रदर्शन स्थगित गर्ने निर्णय लिनुपर्यो,” विज्ञप्तिमा उल्लेख छ।
निर्णयबाट उत्पन्न असुविधाप्रति निर्माता पक्षले दर्शकहरू समक्ष क्षमा पनि मागेको छ। विभोर पोखरेल निर्देशित चलचित्रले खाडी मुलुकमा श्रमका लागि गएका नेपालीहरूको जीवन सङ्घर्ष र यथार्थतालाई पर्दामा उतार्ने प्रयास गरेको छ।
चलचित्रमा प्रमोद चौलागाईं, नीता ढुङ्गाना, छुल्ठिम डोल्मा गुरुङ, रवीन्द्र खड्का, ध्रुव कोइराला, प्रेम सुब्बा, रामचन्द्र अधिकारी, रियर राई, रोशन श्रेष्ठ, ईश्वरी बराल, विमला गिरी, सीमा केसी, सन्दीप तामाङ, सुवास थापा मगर र विशाल थापालगायत कलाकारको अभिनय रहेको छ।
Discussion about this post