मधेश आन्दोलनको पृष्ठभूमिमा बालक अपहरणको कथा प्रस्तुत गर्दै ‘राजागंज’को ट्रेलर सार्वजनिक

विशेष अनलाइन । दीपक रौनियारको निर्देशनमा तयार भएको फिल्म ‘राजागंज’को ट्रेलर सार्वजनिक भएको छ । यो फिल्मले तराईमा हुने गरेको बालक अपहरणको कथालाई प्रस्तुत गरेको छ । सोमबार काठमाडौंमा एक कार्यक्रमका बीच ट्रेलर सार्वजनिक गरिएको हो । ट्रेलरले २०७२ सालमा संविधान जारी भएपछि त्यसको विरोधमा भएको मधेश आन्दोलनको कथा दर्साएको छ ।

फिल्मको शीर्ष भूमिका इन्सपेक्टर पूजाको भूमिकामा आशा मगराती चित्रित छिन् । पूर्वमिस नेपाल समेत रहेकी निकिता चाण्डक पनि प्रहरी अफिसरको रोलमा छिन् । विजय बराल र दयाहाङ राई पनि फिचर्ड छन् ।

‘राजागञ्ज’ फिल्मको निर्माण आदि फिल्म्सका लागि रौनियार र मगराती, बाँसुरी फिल्म्सका लागि रामबाबु गुरुङ र तन्हाउसर गेटका लागि एलन आर मिलिगनले गरेका हुन् । भेनिस फिल्म फेस्टिभलमा वर्ल्ड प्रिमियर भएको ‘राजागञ्ज’ चैत १ गते अर्थात १४ मार्चमा नेपालका हलमा रिलिज हुँदैछ ।