विशेष अनलाइन । चलचित्र ‘पहिचान’ को शुभ मुहूर्त गरिएको छ । धरानको बुढासुब्बा मन्दिरको प्राङ्गणमा एक कार्यक्रम गर्दै चलचित्रको शुभ मुहूर्त गरिएको हो । शुभ मुहूर्तमा पत्रकार महासङ्घ सुनसरीका अध्यक्ष सन्तोष काफ्लेले नरिवल फुटाएका थिए भने क्ल्याप याकथुङ चलचित्रकर्मी सङ्घका अध्यक्ष नवीन मेन्याङ्वोले गरेका थिए । एक्सन कट भने चलचित्रकर्मी महासङ्घ कोशी प्रदेशका अध्यक्ष अरुण कुमार प्रधानले गरेका थिए । चलचित्रका मुख्य कलाकार धिरेन शाक्य र करिष्मा मानन्धरले मुहूर्त सट दिएका थिए ।
भिम लामाको निर्देशनमा बन्न लागेको चलचित्र ‘पहिचान’ पूर्वकै विभिन्न स्थानहरूमा छायाङ्कन गरिने कार्यक्रममा जानकारी दिइयो । चलचित्रकर्मी महासङ्घ कोशी प्रदेशका अध्यक्ष अरुण कुमार प्रधानको प्रमुख अतिथियतामा भएको कार्यक्रममा पूर्वका चलचित्रकर्मी तथा पत्रकारहरूको बाक्लो उपस्थिति रहेको थियो । कार्यक्रममा बोल्दै नेपाल चलचित्र निर्देशक समाजका महासचिव समेत रहेका कार्यक्रमका प्रमुख अतिथि अरुण कुमार प्रधानले अभिनेता धिरेन शाक्य तथा अभिनेत्री करिष्मा आनन्धरलाई पूर्वमा स्वागत गरे । ठट्यौली शैलीमा बोल्दै प्रधानले सानै देखि अभिनेत्री करिष्मा मानन्धरलाई मन पराउने गरेको बताए ।
सुरुवातबाट नै चलचित्र ‘पहिचान’मा जोडिएको उल्लेख गर्दै अभिनेता धिरेन शाक्यले उत्कृष्ट नतिजा निकाल्न सबैले मेहनत गर्ने बताए । यता अभिनेत्री करिष्मा मानन्धरले ‘पहिचान’ का माध्यमबाट पूर्वेली दर्शकसँग नजिकबाट साक्षात्कार गर्ने अवसर प्राप्त भएको उल्लेख गरिन् ।
चलचित्रका निर्देशक भिम लामाले चलचित्र ‘पहिचान’ ऐतिहासिक चलचित्र बन्ने विश्वास व्यक्त गरे । कथा लेखन देखि कलाकार छनौट सम्ममा कुनै कसुर नराखी कथाले मागे अनुसार कै कलाकार छनौट गरिएको निर्देशक लामाको भनाई थियो । निर्देशक लामाकै कथामा निर्माण हुने चलचित्रमा धिरेन र करिष्माका अलावा द्वन्द्व निर्देशक तथा कलाकार राजेन्द्र खड्गी,प्रेम सुब्बा,सुरवीर पण्डित, प्रशान्त तामाङ, किशोर सम्बाहाम्फे, रामजी विष्ट ,रोशन शर्मा , शर्मिला राई ,नव नायिका जेनि घिसिङ लगायतको अभिनय रहने छ ।
भिम लामा फिल्मस् प्रा।लि।को ब्यानरमा निर्माण हुने चलचित्र पूर्वका विभिन्न स्थानहरूमा छायाङ्कन गरिने छ । चलचित्रको निर्मातामा भिम लामा सहित रामजी बिस्ट, छिरिङ लामा, उमेश तामाङ छन् । निर्देशक तथा निर्माता लामाले यस अघि चलचित्र ‘माटो’, ‘भेडिगोठ’ निर्माण गरिसकेका छन् भने ‘फेक फ्रेन्ड’ ,’गोल’ , ‘सरप्राइज’,’नासो’, ‘लिलामे माइला’ लामाले निर्देशन गरेका चलचित्र हुन् ।
Discussion about this post