विशेष अनलाइन । दशैंको घटस्थापनामा रिलिज भएको चलचित्र ‘बेहुली फ्रम मेघौली’ ओटीटीमा रिलिज गरिएको छ । चलचित्रका निर्माता समेत रहेका अभिनेता निश्चल बस्नेतले हलको विकल्प खोज्दै चलचित्र ओटीटीमा रिलिज गरेका हुन् ।
निश्चलले केहीदिन अगाडि आफ्नो चलचित्रलाई दर्शकको राम्रो साथ र चलचित्र हेर्ने चाहना हुँदाहुँदै पनि शोजमा विभेद गरिएको भन्दै हलको विकल्प खोज्ने बताएका थिए । हलमा रिलिज भएको महिना दिन पनि नबित्दै चलचित्रलाई ओटीटीमा रिलिज गरिएको हो ।
चलचित्रलाई आईओएस र एन्ड्रोइडमा उपलब्ध उक्त ओटीटीको एप डाउनलोड गरेर पनि हेर्न सकिने निश्चलले बताएका छन् ।
चलचित्रमा स्वस्तिमा खड्का र निश्चल बस्नेतको मुख्य भूमिका रहेको छ भने बसुन्धरा भुषाल, विजय बराल, सिमरन खड्का, लोकेन्द्र लेखक, रक्षा थापा, सिरु बिष्ट, आमिर गौतम, टीका पहारी लगायतका कलाकारहरुको अभिनय छ। चलचित्रले उमेर पुगेकी युवतीमाथि समाज र परिवारले विवाहका लागि दिने दबाब र त्यसबाट उत्पन्न हुने परिस्थितिको कथा प्रस्तुत गरेको छ ।
चलचित्रमा जयन जे वाइवा र कुशल पोखरेलको संगीत, प्रदीप लामा र केबीका खत्रीको कोरियोग्राफी रहेको छ । स्वस्तिमा खड्काले निर्माण गरेको चलचित्रको छायांकन नरेन्द्र मैनालीले गरेका छन् भने सम्पादन निमेष श्रेष्ठले गरेका हुन्।
Discussion about this post