दयाहाङ र आँचल अभिनित चलचित्र ‘दुःखी आत्मा’को छायाङ्कन सुरु

विशेष अनलाइन । दीपेन्द्र लामाको लेखन तथा निर्देशन रहेको चलचित्र ‘दुःखी आत्मा’को छायाङ्कन सुरु भएको छ । दयाहाङ राई र आँचल शर्मा मुख्य भुमिका रहेने चलचित्रको छायाङ्कन सोमबारदेखि काठमाडौंका विभिन्न स्थानमा भइरहेको छ ।

छायाङ्कन सुरु भए सँगै ‘दुःखी आत्मा’को सेटबाट दयाहाङ र आँचलको केही तस्वीर सार्वजनिक भएका छन् । चलचित्रको सबै छायाङ्कन काठमाडौं उपत्यका सेरोफेरोमा हुने निर्देशक लामाले जानकारी दिएका छन् । निर्माता कडरियाले आफूहरुले चलचित्र भरपुर मनोरञ्जक बनाउन कुनै कसर बाँकी नराख्ने बताएका छन् । क्लक वर्क क्रियसन्सको ब्यानरमा रहेको चलचित्र ‘दुःखी आत्मा’ सोसल-कमेडी जनरामा बन्ने भएको छ ।

निर्देशक लामाले भन्छन्, ‘बाहिर हामी सबैको मुहार हँसिलो देखिए पनि भित्रभित्रै कति दुःखी भइरहेका हुन्छौं, त्यही अवस्थालाई प्रतीकात्मक रुपमा पर्दामा उतार्न खोज्दैछौं । चलचित्रले मानवीय स्वभावका विभिन्न आयाम प्रस्तुत गर्ने विश्वास लिएको छु ।’

हिमाल कडरिया निर्माता रहेको चलचित्रमा दयाहाङ र आँचलका साथमा अनुपविक्रम शाही, बुद्धि तामाङ, पुष्कर गुरुङ, कविता आले, शिशिर बाङ्देल, आशान्त शर्मा, लोकेन्द्र लेखक, अंकित खड्का, लुनिभा तुलाधर, आरती आचार्य, निमा पाण्डे, रियर राई, यासेली योङहाङ लगायतका कलाकारहरुको अभिनय रहने छ ।

यस चलचित्रको छायांकन आलोक शुक्ला गरेका छन् । चलचित्रमा सुशान्त गौतमको संगीत र रामजी लामिछानेको नृत्य रहने भएको छ । चलचित्रको प्रोडक्सन म्यानेजर सुदीप ढकाल रहेका छन् ।