विशेष अनलाइन । चलचित्र निर्देशक, अभिनेता तथा संचारकर्मीमा नाम कमाएका दिनेशराज दाहाल (डीसी) लाइ नेपाल सरकारले चलचित्र विकास बोर्डको अध्यक्षमा नियुक्ति गरेको छ। बिहिबार मन्त्रिपरिषद्को बैठकले डीसीलाई बोर्ड अध्यक्षमा नियुक्त गरेको हो । डीसी सत्तारुढ एमाले निकट जनपक्षीय चलचित्रकर्मी संघको अध्यक्ष समेत रहेका छ्न् ।
बोर्ड अध्यक्षका लागि आवेदन दिएका ६ जनामध्ये डिसीसहित दीपा पाण्डे बस्नेत र राजेश थापाको नाम तालुकवाला निकाय सञ्चार मन्त्रालयले मन्त्रिपरिषद्मा सिफारिस गरेको थियो । सबैभन्दा अगाडि डिसीले नै आवेदन दिएका थिए । र, सुरुदेखि नै उनलाई बोर्ड अध्यक्षको बलियो दाबेदार मानिएको थियो ।
निवर्तमान अध्यक्ष भुवन केसीको कार्यकाल सकिएपछि बोर्डको अध्यक्ष पद रिक्त थियो । सञ्चार तथा सूचना प्रविधिमन्त्री पृथ्वीसुब्बा गुरुङले आजको बैठकपछि डिसीको नियुक्ति बारेमा जानकारी गराउँदै चलचित्र क्षेत्रको विकास र सशक्तिकरणका लागि सरकारको यो निर्णय महत्त्वपूर्ण रहेको बताएका छन् ।
सरकारको यस निर्णयले चलचित्र क्षेत्रका पेशाकर्मीहरूले नयाँ सम्भावना र अवसरको खोजी गर्न प्रेरित हुने विश्वास गरिएको छ । नयाँ नेतृत्वले नेपाली चलचित्र उद्योगमा आवश्यक सुधार र नवप्रवर्तन ल्याउन सक्ने सम्भावना रहेको छ ।
डीसी ले टेलिभिजन तथा रेडियो कार्यक्रमका निर्माता र प्रस्तोताको रुपमा चर्चित रहेका छन् । डिसीले सन् १९९७ मा प्रदर्शन भएकोचलचित्र ‘सुनचाँदी’बाट चलचित्र अभिनयमा डेब्यु गरेका थिए । उनले पछिल्लोपटक चलचित्र ‘फूलैफूलको मौसम तिमीलाई’ निर्देशन गरेका थिए ।चलचित्र निर्देशक समाजका पूर्वअध्यक्ष समेत रहेका डीसी चलचित्र वृत्तमा सक्रिय चलचित्र मेकर हुन् । उनले वर्षेनी चलचित्रको अवार्डको समेत आयोजना गर्दै आइरहेका छन् ।
चलचित्र विकास बोर्डको अध्यक्षको रुपमा आवेदन दिंदै उनले चलचित्र बजार विस्तार गर्ने, बक्सअफिसलाई सुचारु गर्ने, नेपाली चलचित्रको अन्तर्राष्ट्रियकरणमा कार्य गर्ने बिशेष अनलाइन लाई बताएका थिए ।
Discussion about this post