विशेष अनलाइन । चलचित्र ‘घरज्वाइँ’को प्रिमियर शो काठमाडौंमा गरिएको छ । जनक घर्तीले निर्माण गरेको यो चलचित्र शुक्रबारदेखि नेपालसहित केही मुलुकमा समेत प्रदर्शन गर्ने तयारीमा रहेको छ ।
अनिल बुढा निर्देशित चलचित्रले मगर समुदायमा ‘घरज्वाइँ’ राख्ने परम्पराको कथालाइ उठान गरेको छ।पूर्वीरुकुमको मगर गाउँ तकसेरामा सेट गरिएको चलचित्रले घरज्वाइँको परम्परालाई दर्शकसामु देखाइएको छ ।
‘घरज्वाइँ’को प्रिमियर सो मा प्रतिनिधिसभाकी उपसभामुख इन्दिरा रानालगायत् राजनीतिक दलका नेता र कलाकारहरुको उपस्थिति रहेको थियो । चलचित्र हेरिसकेपछि सञ्चारकर्मीसँग कुरा गर्दै उनीहरुले चलचित्रको कथावस्तु र अभिनय पक्षको प्रशंसा गरेका छन्।
चलचित्र हेरेपछि उपसभामुख राना भन्छिन, ‘फेसबुकमा आइलभ यु भन्दैमा प्रेम हुने होइन । घाँस काट्दै, दाउरा काट्दै र काम गर्दैमा पनि प्रेम हुन्छ । यो फिल्मले प्रेमको यो पक्षलाई गहन ढंगले प्रस्तुत गरेको छ।‘मगर समुदायमा एक भएर बस्ने परम्परालाई हामीले फिल्म सिक्नुपर्छ जस्तो लाग्छ।,
अभिनेता दयाहाङ राईले संस्कृतिमाथि आफ्नो चासो रहेको बताएका छन् । दयाहाङ भन्छन्, ‘हरेक संस्कृतिलाई मेरो क्षमताले भ्याएसम्म बुझ्ने कोसिस गर्छु,’ ‘मेनस्ट्रिममा आउनैपर्ने कथा यसमा आइपुगेको छ ।’
समारोहमा मगर पहिरनमा देखिएकी अभिनेत्री मिरुना मगरले छायांकनको क्रममा भलिबल सिक्दाको सम्झना गरिन् । ‘मेरो बुवा पनि व्यवसायिक रुपमै भलिबल खेलाडी हुनुहुन्थ्यो,’ चलचित्रमा भलिबल खेल्ने चरित्रको प्रश्नमा उनले भनिन् ।
अभिनेता कुन्साङ बमजमले धेरै पहिलेदेखि ‘घरज्वाइँ’ हेर्ने पर्खाइमा रहेको बताए । बमजमले चलचित्रको प्राविधिक पक्षको प्रशंसा गरे । अभिनेता शिशिर बाङ्देलले कथा सुनेदेखि नै आफू भावुक बनेको प्रतिक्रिया दिए ।
दयाहाङ र मिरुनाले सँगै काम गरेको यो छैटौं फिल्म हो । यसमा उनीहरुले मगर समुदायको दम्पतीको भूमिका निर्वाह गरेका छन् ।
Discussion about this post