चलचित्र नगरीमा जम्दै गायक सपूत

विशेष अनलाइन । लोक तथा दोहोरीका क्षेत्रमा निकै फ्यान फलोइङ कमाउन सफल गायक हुन् प्रकाश सपूत । उनले सार्वजनिक गरेको गीतले नेपाली दर्शकको मन नजितेको सायदै कमै होला । पछिल्लो समय नेपाली चलचित्रका गीत सङ्गीतमा पनि प्रकाश सपूत जोडिने गरेका छन् । केही समय अघि चलचित्र बोक्सीको घरको गीत बुझिन मैले बुझाइदेऊ कसैले बोलको गीतलाई नेपाली दर्शकले अत्यधिक रुचाएका थिए । त्यसपछि चलचित्र पुजार सार्कीको गीत दर्शन गरेँ हल्का निहुरेर बोलको गीतलाई दर्शकले निकै रुचाएका थिए । प्रकाश सपूतले कुनै पनि गीतमा छोए मात्रै भने पनि दर्शकले रुचाइहाल्छन् भन्दा फरक पर्दैन ।

गीत लेख्न होस् सङ्गीत गर्न होस या गाउन होस् अथवा उक्त गीतमा अभिनय गर्न होस् प्रकाश केहीमा पनि कमी छैनन् । गीत सङ्गीतका क्षेत्रमा अपार सफलता पाइरहेका गायक प्रकाश सपूत बिस्तारै चलचित्र नगरीमा समेत व्यस्त बन्दै गएका छन् । गत दसैँको अवसर पारेर असोज २६ गतेबाट प्रदर्शनमा आएको चलचित्र ‘परदेशी २’ लाई नेपाली दर्शकले रुचाएपछि सपूत आफैँ चलचित्र निर्माणमा कस्सिने तयारीमा छन् । सपूतले चलचित्र नगरीमा पाइला टेकेको पहिलो चलचित्र ‘परदेशी २’ ले सफलता मात्र प्राप्त गरेन, प्रदर्शनको ५१औँ दिन मनाउन समेत सफल भएको थियो ।

नारायण रायमाझी निर्देशित चलचित्र ‘परदेशी २’ले नेपाली युवा वैदेशिक रोजगारका लागि गएपछि आउने उतार चढावको कथा उठान गरेको छ । चलचित्र ‘वसन्त’ निर्माणको घोषणा गरिसकेका सपूत यति बेला भने अर्को चलचित्र ‘पूर्ण बहादुरको सारङ्गी’को छायाङ्कनमा व्यस्त छन् । सेभेन सिज सिनेमाको प्रस्तुतिमा बन्न लागेको चलचित्र ‘पूर्ण बहादुरको सारङ्गी’ले ओखलढुङ्गा जिल्लाको रुम्जाटारबाट छायाङ्कन सुरु गरेको छ । चलचित्रका लागि पहिलो दृश्य नै प्रकाश सपूत र बाल कलाकार जान्भि पौडेल दिएका थिए । सरोज पौडेलको लेखन तथा निर्देशनमा बन्न लागेको चलचित्र ‘पूर्ण बहादुरको सारङ्गी’मा सपूत सँगै विजय बराल, मुकुन भुसाल, अञ्जना बराइली, विनोद न्यौपाने, भोलाराज सापकोटा, बुद्धि तामाङ, माओत्से गुरुङ, देशभक्त खनाल लगायतका कलाकारको समेत अभिनय रहने छ ।

चलचित्र ‘पूर्ण बहादुरको सारङ्गी’ पश्चात् प्रकाश आफ्नै कथा, निर्देशन तथा अभिनय रहने चलचित्र ‘वसन्त’ मा व्यस्त हुने छन् । चलचित्रको छायाङ्कन आगामी भदौदेखि थालिने बताइएको छ । चलचित्रमा प्रकाश आफै मुख्य भूमिकामा देखिने छन् भने नायिकामा स्वस्तिमा खड्का हुने छिन् । चलचित्रका अन्य कलाकारहरूमा अनुप बराल, प्रकाश घिमिरे र कमलमणि नेपाल लगायत रहने छन् ।

गलबन्दी प्रोडक्सनको ब्यानरमा बन्ने चलचित्रका कार्यकारी निर्माता मोहन विक, अनुरोध भट्टराई र नेन्सी शेरचन छन् । चलचित्र २०८१ को चैते दसैँमा प्रदर्शनमा ल्याउने घोषणा निर्माण पक्षले गरेको छ । यसरी हेर्दा प्रकाश सपूत अब चलचित्र नगरीमा पनि निकै डिमाण्डेड बन्दै गइरहेका छन् ।