म्याजिक हलको पुर्नजन्म

बिशेष अनलाइन । एकाएक दनदन दन्किएको आगो देख्दा लाग्थ्यो नेपाली चलचित्र नगरीले अब एउटा दरिलो खम्बा गुमायो । आगोको मुस्लो हेर्न आएका धेरैले आफ्नै आफ्नै अड्कलबाजी गरिरहे । पर्शुराम चौधरी अब सडकमा आए,बिमा गरेकै होला क्षतिपूर्ति पाइहाल्छन् नी, लकडाउन भएको थियो त्यसैले कतै आफै आगो लगाएको त हैन ?, हल चलाउन सकेनन् अनि बिमा रकमका लागि आफै आगो लगाए क्यारे…..अड्कलबाजी आफ्नै आफ्नै थिए । यता करोडौको क्षतिको पिडा उनलाई मात्रै थियो, जस्ले अबको बाटो मात्रै अन्धकार देखिरहेका थिए ।

एकातिर आगोको मुस्लोले करोडौको क्षति गरिरहेको थियो । अर्कातिर मनको आगोले शरिरमा अशंख्य पिडा दिएको थियो । उनी आफैलाई लाग्दै थियो, सयद अब चलचित्र नगरीको यात्रा यति नै रहेछ । त्यसमाथि बिभिन्न अड्कलबाजीहरुले उनको त्यो मनमा बलेको आगोलाई थप मलजल गरिरहेको थियो । लामो समय देखि हिड्दै आएको बाटोमा दोवाटो आइपुगेर अलमल्ल परेको बटुवाको अवस्थामा आइपुगेका थिए पर्शुराम चौधरी ।

दुनियामा सबै नकारात्मक मात्र पक्कै हुदैन । लामो समयसम्मको चलचित्र सहयात्रामा दुख अनि शुखमा साथ दिने धेरै सहयात्री कमाएका थिए उनले । पर्शुराम तिमी फेरी उठ्नुपर्छ । तिम्रो यात्रा अझै लामो छ । चलचित्र नगरीलाई तिमीजस्तो पुर्ण व्यक्तिको धेरै खाचो छ । निरन्तर हिडिरहेको यात्रीलाई कहिलेकाही ठेस लाग्न सक्छ,त्यस्ता झिना कुराहरुलाई पन्छाउनु पर्छ, तिमी फेरी आउनुपर्छ । तिम्रो साथमा लाखौ शुभचिन्तक छन् । दर्शकले पहिलेको भन्दा अत्याधुनिक चलचित्र घरको प्रतिक्षा गरिरहेका छन् …..शुभचिन्तकका यस्तै यस्तै हौसलापूर्ण वचनले चौधरीलाई थप हौसला मिल्यो । भित्रभित्रै मैले अझै धेरै काम गर्न बाकी छ भन्ने महशुष गर्न थाले ।

जस्ले जे भने पनि बिमा गरेको छ, त्यहीबाट आएको रकममा आफुले थप गरी पुन चलचित्र हल नै निर्माण गर्छु, उनी जोसिए । पुन चलचित्र हल निर्माण गर्ने अठोटमा लागे । कुरा काट्नेहरुले कुरा काटिरहे । अड्कलबाजी गर्नेहरुले आफ्नै आफ्नै तर्क गरिरहे । उनी निरन्तर अघि बढे । परिवार,इष्टमित्र लागायतबाट हौसला पाए । उनी त्यतिबेला पुन एकपटक छागाबाट खसे, जब बिमा कम्पनीले चलचित्र हल भित्रको सामानको नभइ म्याजिक सिनेमा हलको भवनको मात्र बिमा भएको र उक्त रकम भुक्तानी हुन नसक्ने कुरा उल्लेख गरे । क्षति भएको प्रमाण बोकेर उनी झिनो आस लिएर पटक पटक बिमा कम्पनी धाए । तर, उनको केही लागेन । आफ्नो करोडौको क्षति भएको प्रमाण सहित वडा कर्यालय,नगरपालिका,प्रदेश मन्त्रालय हुदै कयौँपटक कन्द्रिय मन्त्रालय नधाएका हैनन् पर्शुरामले । तर कुनै मातहतले पनि उनको कुरा सुन्ने प्रयास सम्म गरेनन्, क्षेतिपूर्ति दिनु त धेरै परको कुरा ।

उनले फेरी एकपटक हारेको महशुष गरे । भनिन्छ जाहाँ समस्या त्याहा उपाए हुन्छ । उनका छोरा बुहारी श्रीमति अनी वृद्ध अवस्थाका बुबाआमाले हौसला दिए । जे नहुनुपथ्र्यो त्यो भइसक्यो । अब सबैकुरा बिर्सिएर पुन अघि बढ्नुपर्छ । तिम्रो समथमा हामी छौ । तिमी अघि बढ । परिवारका सदस्यले पुर्ण साथ दिए पछि उनी फेरी चलचित्र हल निर्माणका निमित्त अघि बढे । साथमा पैसा थिएन । रिण लिनु नै थियो । रिण लिएर भए पनि उनी चलचित्र हल निर्माणमा अघि बढे । दिनरात नभनी मेहेनत गरे ।

अन्तत छोटो समयको अन्तरालमा उनी अत्याधुनिक चलचित्र हल निर्माण गर्न सफल भए । पहिलेको भन्दा उत्कृष्ट सामानको प्रयोगमा पहिलेको भन्दा उत्कृष्ट चलचित्र हल निर्माण गर्न सफल भए । पुणरुपमा जलेर नस्ट भएको करिव साढे ४ महिनाको अन्तरालमा उनी पुन चलचित्र हल पुननिर्माण गर्न सफल भएका हुन् । उनी भन्छन्, यति छोटो समयमा यति धेरै काम हुन्छ भन्ने लागेकै थिएन । तर सबैको आशिर्वादले पुन म्याजिक हल जन्मिएको छ । माया मारेको सन्तान निको भएर घर फर्किएको अनुभुति भएको छ ।

पहिले २५ फिट पर्दा भएकोमा हाल पुन निर्माण गर्दा बढाएर २८ फिट बनाइएको छ । पहिलेको भन्दा स्तरोन्नति गरी १७० सिट निर्माण गरिएको छ । पहिले १२ वटा स्पिकर भएकोमा हाल शंख्या बढाएर १८ वटा बनाइएको छ भने हाल सबै पार्टहरुको बिमा पुर्णरुपमा गरिएको छ ।

झण्डै सवा २ करोड लगानी गरेर उनी फेरी चलचित्र नगरीमा होमिएका छन् । फेरी सबै कुरा बिस्तारै लयमा आउना थालेको अनुभुति गर्न थालेका छन् । कोरोना भाइरस कम हुदै जादा अब निरन्तर चलचित्र प्रदर्शन गर्ने तायरीका साथ चलचित्र प्रदर्शन सुरु गरिएको छ ।