जाहेरीपछि ‘म यस्तो गीत गाउँछु २’ को प्रिमियरमा सहभागी भएनन् पल

बिशेष अनलाइन । अभिनेता पल शाह फिल्म ‘म यस्तो गीत गाउँछु २’ को प्रिमियरमा अनुपस्थित भएका छन् । जिल्ला प्रहरी कार्यालय तनहुँमा आफू विरुद्ध करणीसम्बन्धी उजुरी परेपछि उनी फिल्मको प्रिमियरमा अनुपस्थित भएका हुन् । शाहबाट आफू पीडित भएको भन्दै एक नाबालिगले उनी विरुद्ध करणीको उजुरी दिएकी छन् ।

पलका कारण फिल्मको प्रिमियर समेत ढिला सुरु भएको छ । प्रिमियर कीर्तिपुरको पाँगामा नयाँ खुलेको फिल्म हल ‘कीर्तिपुर कप्लेक्स’ मा आयोजना गरिएको थियो । साँझ ५ः३० मा सुरु हुने भनिएको प्रिमियर पलकै कारणले ७ः३० मा सुरु भएको छ ।

तीन वर्ष अगाडि नै निर्माण सम्पन्न भएको फिल्म ‘म यस्तो गीत गाउँछु २’ कोरोनाको कारण रिलिज हुन सकेको थिएन । अहिले शिवरात्रिको छेको पारेर १३ फागुनबाट रिलिज हुन लागेको हो । सुदर्शन थापाले निर्देशन गरेको फिल्ममा पल शाह र पूजा शर्माको मुख्य भूमिका रहेको छ ।

जिल्ला प्रहरी कार्यालय, कास्कीमा शाहविरुद्ध जाहेरी दिएकी अधिकारीले त्यहास्थित प्रहरीले घटनास्थल तनहुँ भएकाले तनहुँमै दर्ता गर्न सुझाव दिएको थियो । समिक्षाका बाबुले दिएको जाहेरीमा विभिन्न मितिमा तीनपटक जवरजस्ती करणी गरेको उल्लेख छ । अन्तिम पटक करणी भएको स्थान तनहुँ भएको हुँदा त्यही जाहेरी दिइएको हो ।

एउटा म्यूजिक भिडियोको सुटिङका क्रममा तनहुँ गएका बेला शाहले फकाएर आफूमाथि करणी गरेको उनको आरोप छ । १८ वर्षभन्दा कम उमेरकी अधिकारीले शाहले आफूमाथि फकाएर करणी गरेको दाबी गर्दै आएकी छन् ।

जाहेरीमा माया प्रेमको झुठा नाटक गरी जवरजस्ती गर्ने गर्ने पल शाहलाई मुलुकी अपराध संहित २०७४ को दफा २१९ ९१० विपरीतको कसुर अपराधमा कडा भन्दा कडा कारबाही गरी कानुन बमोजिम सोही संहिताको दफा २२८ बमोजिम पीडीतलाई उचित क्षतिपूर्ति समेत दिलाउन माग गरिएको छ ।