बिशेष अनलाइन । अभिनेता अनमोल केसीले चलचित्र ‘एक्स ९’ मा काम गर्दै छन् । त्यस सँगै उनले अभिनय गर्ने २ वटा चलचित्रहरु बट्टमलाइनमा छन् । अभिनेता केसीले नेपाली चलचित्र होस्टेल’बाट चलचित्र नगरीमा डेब्यू गरेका थिए । ‘होस्टेल’ मा अभिनय गरेदेखि ‘ए मेरो हजुर ३’ सम्म आइपुग्दा उनले भिन्ना भिन्नै अभिनेत्रीहरुसँग काम गरेका छन् । ‘ए मेरो हजुर ४’ मा भने उनले पहिलो पटक एउटै अभिनेत्रीसँग दोहोर्याएर काम गरे ।
प्रदर्शनको तयारीमा रहेको चलचित्र ‘ए मेरो हजुर ४’ मा अभिनेता केसीले अभिनेत्री सुहाना थापासँग दोहोर्याएर काम गरेका हुन् । होम प्रडक्शनमा बन्ने चलचित्रमा काम गर्ने तयारीमा रहेका अभिनेता केसीलाई चलचित्र ‘एक्स ९’मा महंगो पारिश्रमिकका साथ अफर गरिएको थियो ।
महंगो अफर आएपछि उनले होम प्रोडक्शनलाई केही पछि सार्दै चलचित्र ‘एक्स ९’मा काम गर्ने तयारी गरेका हुन् । चलचित्र ‘एक्स ९’मा उनले कुन अभिनेत्रीसँग रोमान्स गर्छिन् भन्ने तय भएको छैन । यता चलचित्र ‘एन्टी हिरो’ मा अभिनेत्री जसिता गुरुङसँग रोमान्स गर्ने पक्का भइसकेको बताइएको छ ।
होम प्रोडक्शनको ब्यानरमा निर्माण हुन लागेको चलचित्र ‘पारस’ मा पनि नयाँ अभिनेत्रीसँग काम गर्ने लगभग निश्चित भएका खबर बाहिरिएका छन् । अभिनेता केसीले चलचित्र ‘पारस’मा नव अभिनेत्री आग्या करनजीतसँग काम गर्न लागेको बताइएको छ । चलचित्रका लागि अडिसनबाट नव अभिनेत्री आग्यालाई छनोट गरिएको जानकारी प्राप्त भएको छ ।
आग्याले यसअघि केही कमर्शियल विज्ञापनमा काम गरेकी छन् । आग्यालाई ‘पारस’ मा अनुबन्ध गरेको औपचारिक घोषणा भने भएको छैन । तर, दुबै पक्षबिच मौखिक सहमति भएको बुझिएको छ ।
अनमोलले केही दिन अगाडि इन्स्टाग्राममा एक तस्विर शेयर गर्दै उक्त तस्विरको क्रेडिट आग्यालाई दिएका छन् । यता आग्याले पनि अनमोल र अनुपविक्रम शाहीसँगको भेटको एक तस्विर इन्स्टाग्राममा शेयर गरेकी थिइन् । ‘लुट’ निर्माता माधव वाग्लेले निर्देशन गर्ने चलचित्र ‘पारस’लाई अभिनेता भुवन केसीले निर्माण गर्न लागेका हुन्।
Discussion about this post