बिशेष अनलाइन । नेपाल आदिवासी चलचित्र “निफ” अवार्ड नेवार भाषाको चलचित्र “जा मनः गुभाजु”ले जितेको छ । अमेरिकाको न्युयोर्कमा दुई दिनसम्म भएको तेस्रो नेपाल आदिवासी चलचित्र महोत्सवमा सहभागि विभिन्न भाषाका सातवटा चलचित्र मध्ये नेवारी भाषाको चलचित्र “जा मनः गुभाजु” ले उत्कृष्ट आदिवासी चलचित्र अवार्ड जितेको हो ।
नेवारी चलचित्र “जा मनः गुभाजु”ले उत्कृष्ट अवार्डसंगै उत्कृष्ट पटकथा र उत्कृष्ट अभिनेताको पुरस्कार समेत हात पारेको छ । पुरस्कृत नेवारी चलचित्रले अवार्डसहिस १ हजार १ सय ११ अमेरिकी डलर नगद पुरस्कार हात पारेको छ ।
नेपाल आदिवासी जनजाति महासंघ अमेरिकाका अध्यक्ष लोक चेम्जोङ र न्युयोर्कस्थित नेपाली महाबाणिज्य दूत विष्णुप्रसाद गौतमले संयुक्त रुपमा पुरस्कार हस्तान्तरण गरेका थिए ।आइतबार राती अबेरसम्म संचालन भएको अवार्ड वितरण समारोहमा उत्कृष्ट चलचित्रसहीत विभिन्न १० विधामा पुरस्कार वितरण गरिएको थियो ।
सो क्रममा उत्कृष्ट नायिकामा मगरभाषाको चलचित्र “ट्याङचालक”की नायिका तिला मगर घोषित भएकी छिन् भने लिम्बु जातिको चलचित्र “के” ले उत्कृष्ट कथा, ह्योल्मो जातिको “मेटोक” ले उत्कृष्ट छायाँकन र दर्शक रोजाईको पुरस्कार जितेको छ । यसैगरी तामाङ जातिको चलचित्र “प्रङ्ना” लाई उत्कृष्ट भेषभुषा पुरस्कार र गुरुङ जातिको चलचित्र “मि होर्वै ट” ले उत्कृष्ट संगीत र उत्कृष्ट निर्देशनको अवार्ड हात पारेका छन् ।
२७ औं विश्व आदिवासी दिवसको अवसरमा नेपाल आदिवासी जनजाति महासंघ “फिप्ना” अमेरिकाले आदिवासी जनजातिको भाषा, भेषभुषा, संस्कृतिको संरक्षणमा सहयोग पुर्याउने उदेश्यले महोत्सब आयोजना गरेको बताइएको छ । अवार्ड वितरण समारोहमा गायकद्धय राजु लामा र जगदिस समालले प्रस्तुती दिएका थिए । कार्यक्रममा विभिन्न आदिवासी समुदायका साँस्कृति झल्किने गीत र नृत्यहरु समेत प्रस्तुत गरिएको थियो ।
Discussion about this post