विशेष अनलाइन । चलचित्र ‘लन्डन टु पेरिस’ विदेशमा छायाङ्कन भए पनि कथावस्तु नेपाली परिवेशकै रहेको निर्देशक घनश्याम लामिछानेले बताएका छन् ।निर्देशक लामिछानेले नेपाली डायस्पोरा (दयाशील) को कथा चलचित्रमा बुझिदिन सबैमा अनुरोध गरेकाछन् ।
निर्देशक लामिछाने भन्छन् ,‘हाम्रो बुझाइमा गाउँको कथा मात्र कथा हो भन्ने छ, तर त्यो बुझाई गलत हो । शेर्पा, थारु, गुरुङ, कौडा, रोधीलाई मात्र कथा मान्छौँ । बाहिर बस्ने नेपालीको कथा पनि हाम्रै कथा हो’, ‘मुलुक बाहिर बस्ने युवा पुस्ताको कथा पनि भन्न आवश्यक छ भनेर चलचित्र बनेको हो ।’
सबैले पछिल्लो समय गाउँकै कथा दर्शकलाई देखाएका कारण आफूले फरक कथा देखाउन खोजेको उनको भनाई छ । उनी चलचित्र हेरिरहँदा दर्शकले कथा बाहिर गएजस्तो नलाग्ने निर्देशक लामिछानेले दाबी गरेकाछन् ।
लामिछानेले भन्छन् ‘चलचित्रको पात्रसँग दर्शकले आफूलाई मजाले रिलेट गर्न सक्नुहुन्छ । यो अलिकति लार्जर देन लाइफ छ । अहिले हामी एउटै फ्लेभरका चलचित्र हेरेर दिक्क भइसकेका छौँ । त्यसकारण दर्शकलाई ‘लन्डन टु पेरिस’ ले रिफ्रेस बनाउँछ’।
लभस्टोरी कथा रहेको चलचित्र ‘लन्डन टु पेरिस’ प्रदीप भारद्वाजले लेखेका हुन् । चलचित्रमा साम्राज्ञी लक्ष्मी शाह, निश्चल खड्का, गरिमा शर्मा, कविर खड्का, रुष्मा थापा, मनिश श्रेष्ठ, मनिष गान्धी र लोकविक्रम मल्ल लगायतको मुख्य भूमिका रहेको छ ।
एबी इन्टरनेश्नलको प्रस्तुतिमा रहेको चलचित्र गौतम प्रोडक्शन र अर्चिड भेस फिल्मस् लिमिटेडको निर्माण सहकार्यमा बनेको हो । अमित बस्नेतले निर्माण गरेको चलचित्रको आरोन बस्नेत, एरियाना बस्नेत तथा परी राना निर्माता रहेका छन् ।
सनिश खकुरेल र अजित केआर थापा चलचित्रको सह–निर्माता हुन् भने अङ्कित गौतम, सुरज कुँवर र विजय भण्डारी यसका कार्यकारी निर्माता हुन् । चलचित्र आगामी शुक्रवारबाट सार्वजनिक प्रदर्शनमा आउँदैछ ।
Discussion about this post