विशेष अनलाइन। जीएम मुभिज प्रालिको प्रस्तुतिमा निर्माण भएको चलचित्र ‘मितज्यू’ को आधिकारिक ट्रेलर सार्वजनिक भएको छ। अनिल बुढा मगरको निर्देशन र जनक घर्ती मगरको निर्माणमा तयार भएको यो चलचित्र आगामी जेठ ८, २०८३ मा प्रदर्शन हुँदैछ। ३ मिनेट १४ सेकेन्ड लामो ट्रेलरमा ग्रामीण परिवेश, गहिरो मित्रता र परिस्थितिले निम्त्याउने द्वन्द्वलाई रोचक ढंगले प्रस्तुत गरिएको छ।
ट्रेलरको सुरुवातमा दयाहाङ राई र सौगात मल्ललाई घनिष्ठ ‘मित’ को रूपमा देखाइएको छ। तर, कथा अघि बढ्दै जाँदा उनीहरूबीच उत्पन्न हुने अविश्वास र टकरावले ट्रेलरलाई थ्रिलर मोडमा पुर्याउँछ। विशेषगरी सौगातको गम्भीर अवतार र दयाहाङको स्वभाविक अभिनयले दर्शकलाई आकर्षित गर्छ। ट्रेलरमा देखिएका द्वन्द्वका दृश्य र भावनात्मक संवादले चलचित्र सशक्त बनेको संकेत गर्दछ।
चलचित्रमार्फत डेब्यु गरेकी तेरिया फौजा मगरलाई ट्रेलरमा एउटा चञ्चल तर कथाको केन्द्रविन्दुमा रहने पात्रको रूपमा देख्न सकिन्छ। चलचित्रमा दयाहाङ, सौगात र तेरियाका साथै पुस्कर गुरुङ, सुवर्ण थापा, शिशिर बाङ्देल, राज थापा काउचा, अनु थापा, अरुण पुन मगर, स्मिता लामिछाने, पबित्रा खड्का, खड्ग बहादुर पुन मगर (खबपु), उमेश सुनाम, अनुषा राई, उत्तम राज पाण्डे, चाहना राना मगर, रुषा न्यौपाने, सबिन कट्टेल, महाराज लगुन, निता पुन मगर र खिम राहु मगर लगायतका कलाकारहरूको अभिनय रहेको छ।
चलचित्रमा महेश राईको लेखन, शिशिर बिशंखेको छायांकन तथा लोकेश बज्राचार्यको सम्पादन रहेको छ। चलचित्रको डिजिटल पार्टनर ओएसआर डिजिटल रहेको छ ।चलचित्रलाई रोहित काट्टेल र रत्न श्रेष्ठ (आरआर फिल्म्स) ले वितरण गरेका हुन्।
Discussion about this post