विशेष अनलाइन । नेपाली चलचित्र क्षेत्रमै पहिलो पटक भित्रिएको ‘साइन्स फिक्सन’ (विज्ञान–कल्पना) विधाको चलचित्र ‘एक्लो-१’ को प्रचार शैली यतिबेला चर्चाको केन्द्रमा छ। हलिउड र बलिउडमा निकै रुचाइने यो विधालाई नेपालमा पहिलो पटक प्रयोग गर्दै वैज्ञानिक आविष्कार, अन्तरिक्ष यात्रा र भविष्यको परिकल्पनालाई यस चलचित्रमा उतारिएको छ। सार्वजनिक ट्रेलरले नै यसको फरक स्वादको संकेत दिइसकेको छ, जसका कारण दर्शकमाझ यसलाई लिएर ठूलो कौतुहलता छाएको छ।
मुख्यतः युवा तथा ‘जेनजी’ पुस्तालाई लक्षित गरिएको यस चलचित्रको निर्माण टोलीले आफ्नो प्रचार रणनीतिलाई पनि आधुनिक र शैक्षिक संस्थाहरू केन्द्रित बनाएको छ। विज्ञान र प्रविधिमा रुचि राख्ने युवा वर्गलाई हलसम्म तान्न निर्माण समूहका सदस्यहरू यतिबेला काठमाडौँका विभिन्न कलेजहरूमा पुगिरहेका छन्। विद्यार्थीहरूसँग प्रत्यक्ष साक्षात्कार गर्दै चलचित्रको विषयवस्तु र नेपाली सिनेमामा भित्रिएको नयाँ प्रविधिको बारेमा उनीहरूले जानकारी बाँडिरहेका छन्।
प्रचार अभियानकै क्रममा केही दिनअघि टोली मन्डीकाटारस्थित ‘गेट कलेज’ पुगेको थियो, जहाँ टुरिजम र हस्पिटालिटीका विद्यार्थीहरूले कलाकारहरूसँग अन्तर्क्रिया गरे। त्यस्तै, मंगलबार ललितपुरको ‘च्यापियन कलेज’ मा पुगेर पनि टोलीले आफ्नो उपस्थिति जनाएको छ। कलेज पुग्दा अभिनेता प्रदीप खड्का, अभिनेत्री कविता नेपाली र निर्देशक प्रदीप शाहीले विद्यार्थीहरूको प्रश्नको उत्तर दिँदै नेपाली चलचित्रमा भइरहेको यो नयाँ प्रयोगको आवश्यकतामाथि प्रकाश पारेका थिए।
आगामी १७ पुसबाट प्रदर्शनको तयारीमा रहेको यस महत्वाकांक्षी चलचित्रमा कलाकारहरूको जम्बो र प्रभावशाली टोली छ। प्रदीप र कविताका साथै दिग्गज कलाकारहरू विजय लामा, सुनील थापा, दीया पुन, बेनिशा हमाल, दिनेश डीसी र सुरजसिंह ठकुरीलगायतकोकलाकारहरुको अभिनय रहेको छ। साथै, बेलायती अभिनेता जेमी बेकनको उपस्थितिले यस चलचित्रलाई अन्तर्राष्ट्रिय स्तरको समेत बनाएको छ।
एनआरएन समूहको लगानी रहेको यस चलचित्रका निर्माता स्वयं अभिनेता प्रदीप खड्का हुन्। परम्परागत प्रेमकथा र एक्सनभन्दा केही भिन्न हेर्न चाहने नेपाली दर्शकका लागि ‘एक्लो-१’ एउटा नयाँ अनुभव हुने दाबी गरिएको छ।
Discussion about this post