विशेष अनलाइन । अभिनेता निखिल उप्रेतीको निर्देशनमा बनिरहेको बहुप्रतिक्षित चलचित्र ‘आचार्य’ को छायाङ्कन कार्य केही समयका लागि स्थगित भएको छ । सर्लाहीमा खिचिने क्रममा रहेको यो चलचित्रको काम केही दिनदेखि रोकिएपछि निर्माण टोली हाल काठमाडौँ फर्किएको छ ।
छायाङ्कन रोकिनुको कारण चलचित्रको काम रोकिनुको मुख्य कारण प्राविधिक समस्या नभई कलाकारहरूको समय (डेट) को व्यवस्थापन रहेको बुझिएको छ । निर्देशक उप्रेतीका अनुसार यस चलचित्रमा बलिउड र दक्षिण भारतीय चलचित्रका केही चर्चित कलाकारहरूको पनि अभिनय रहेको छ । ती भारतीय कलाकारहरू जनवरी महिनामा मात्र उपलब्ध हुने भएपछि केही समयका लागि सुटिङ ‘ब्रेक’ गरिएको हो ।
निर्देशक उप्रेतीले भने– “ती कलाकारहरूको समय जनवरीमा मात्र मिलेको छ । त्यतिन्जेलसम्म खाली बस्नुभन्दा खिचिसकिएको भागको सम्पादन (एडिटिङ) गरौँ भनेर हामी काठमाडौँ फर्किएका हौँ ।”
७० प्रतिशत काम सम्पन्न भदौ ६ गते भारतको प्रसिद्ध पर्यटकीय क्षेत्र ‘डुअर्स’ बाट सुरु भएको यस चलचित्रको यात्रा बागडोगरा, सिलिगुडी र ठाकुरगन्ज हुँदै सर्लाहीसम्म आइपुगेको थियो । हालसम्म चलचित्रको ७० प्रतिशत छायाङ्कन सकिएको र बाँकी ३० प्रतिशत काम भारतीय कलाकारहरूको समय मिल्नासाथ सुरु हुने जानकारी निर्माण पक्षले दिएको छ ।
सञ्चिताको नयाँ अवतार अभिनेत्री सञ्चिता लुइँटेल निर्माता रहेको यस चलचित्रमा उनी स्वयं र निखिलका साथै प्रमोद अग्रहरी, कामेश्वर चौरासिया, विशाल पहारी जस्ता सशक्त कलाकारहरूको अभिनय रहेको छ । यो चलचित्र सञ्चिताका लागि झन् विशेष रहनेछ, किनकि उनले यसैमार्फत कोरियोग्राफी (नृत्य निर्देशन) मा समेत पाइला चाल्दै छिन् । उनले चलचित्रको नेपाली र हिन्दी दुवै संस्करणमा रहने एक गीतको कोरियोग्राफी गर्ने तयारी गरेकी छिन् ।
Discussion about this post