विशेष अनलाइन । नेपाल चलचित्रकर्मी महासंघ कोशी प्रदेशले आफ्नै स्थायी भवन निर्माणका लागि शिलान्यास कार्यक्रम सुन्दरहरैंचामा भव्य रूपमा सम्पन्न गरेको छ। महासंघका केन्द्रीय अध्यक्ष तथा निर्देशक अरुण कुमार प्रधानको जन्मोत्सवको अवसर पारेर आयोजना गरिएको उक्त कार्यक्रम मोरङको सुन्दरहरैंचा नगरपालिका–२, मृगौलिया स्थित फ्युचर कोलोनी एण्ड रियल स्टेट परिसरमा सम्पन्न भएको हो।
कार्यक्रमको संयोजन फ्युचर कोलोनी एण्ड रियल स्टेटका प्रबन्धक याम लामाले गर्नुभएको थियो। सो अवसरमा महासंघका लागि १ कट्ठा जग्गा उपलब्ध गराउने तथा उक्त जग्गामा एक तल्ले भवन निर्माण गर्ने प्रतिबद्धता फ्युचर रियल स्टेटले जनाएको छ।
शिलान्यास कार्यक्रममा चलचित्र, गीत–संगीत तथा कला क्षेत्रका चर्चित व्यक्तित्वहरूको उल्लेखनीय सहभागिता रहेको थियो। कार्यक्रममा नायक तथा निर्देशक गजित बिष्ट, निर्देशक सौगात बिष्ट, इन्द्र परियार, बिनोद पुडासैनी, पुष्प श्रेष्ठ, विजय सम्योग सुब्बा, सुरेन्द्र भुजेल, लाखमान योञ्जन, भिम लामा, सौगात रिजाल, श्रीकृष्ण लुइटेल ‘बोकेदारी’, मनोज दाहाल, जय चौधरी, जानकी चौधरी, हिमाल दाहाल, झोटन मेहता, सम्झना भट्टराई, गंगा कुँवर, गंगा गौतम आचार्य, उपेन्द्र राई, रञ्जु डाँगी सोनी लगायत कोशी प्रदेशभरिका चलचित्रकर्मी तथा कलाकारहरूको उपस्थिति रहेको थियो।
कार्यक्रमलाई सम्बोधन गर्दै नेपाल चलचित्रकर्मी महासंघ कोशी प्रदेशका अध्यक्ष अरुण कुमार प्रधानले यो अवसर आफूका लागि मात्र नभई सम्पूर्ण कोशी प्रदेशका चलचित्रकर्मीहरूका लागि ऐतिहासिक र स्मरणीय भएको उल्लेख गर्नुभयो। उहाँले महासंघलाई स्थायी थलो उपलब्ध गराउने फ्युचर रियल स्टेट परिवारप्रति विशेष धन्यवाद व्यक्त गर्दै निर्माणाधीन भवनले प्रदेशका चलचित्रकर्मीहरूलाई साझा, व्यवस्थित र दीर्घकालीन केन्द्र प्रदान गर्ने विश्वास व्यक्त गर्नुभयो।
आयोजकका अनुसार भवन निर्माण परियोजना चरणबद्ध रूपमा अगाडि बढाइनेछ। भविष्यमा सोही जग्गामा चलचित्र छायांकन स्टुडियो तथा करिब १५० सिट क्षमताको सिनेमा हल निर्माण गर्ने दीर्घकालीन योजना समेत रहेको जनाइएको छ।
शिलान्यास कार्यक्रममा जन्मोत्सवको उत्साह, कलाकारहरूको एकता र भविष्यप्रतिको प्रतिबद्धता झल्किएको सहभागीहरूको भनाइ छ। उक्त कार्यक्रमसँगै कोशी प्रदेशको चलचित्र क्षेत्रमा नयाँ अध्यायको सुरुवात भएको अनुभूति गरिएको छ।
Discussion about this post