विशेष अनलाइन । भारतीय र नेपाली चलचित्रकर्मीको संयुक्त प्रयासमा नयाँ चलचित्र ‘मोना लिसा (ब्लडी लभ)’ निर्माण हुने भएको छ। घटस्थापनाको अवसर पारेर निर्माण युनिटले चलचित्र निर्माणको घोषणा गरेको हो।
चलचित्र बी एन्ड के इन्टरटेन्मेन्ट र अक्स इन्टरनेशनल स्टुडियोजको संयुक्त ब्यानरमा निर्माण हुनेछ। यसको लेखन तथा निर्देशन किङ योगी ले गर्नेछन्। ठुलो बजेटमा निर्माण हुने चलचित्रमा भारतसहित विभिन्न देशका अनुभवी प्राविधिक टोली संलग्न हुने जानकारी अक्स इन्टरनेशनल स्टुडियोजले दिएको छ।
निर्माण पक्षले बताएको छ कि यसअघि ठुला अन्तर्राष्ट्रिय चलचित्रमा काम गरिसकेका प्राविधिक समूह संलग्न हुने भएकाले फिल्मको प्राविधिक पक्ष बलियो हुने अपेक्षा गरिएको छ। हाल चलचित्रको प्रारम्भिक तयारीसँगै कलाकार छनोट भइरहेको छ। निर्माण युनिटका अनुसार, चलचित्र कथा, शैली र भिजुअलमा नवीनपन ल्याउने उद्देश्यसहित निर्माण हुँदैछ। चलचित्रलाई सन् २०२६ मा विश्वव्यापी रूपमा प्रदर्शन गर्ने योजना रहेको छ।
सार्वजनिक गरिएको पहिलो पोस्टरमा चलचित्रलाई ‘ब्लडी लभ’ (रगतिलो प्रेम) भन्ने ट्यागलाइन दिइएको छ। यसले चलचित्रमा रोमान्स र एक्सनको अनौठो मिश्रण रहने सङ्केत दिन्छ। निर्माण पक्षले बताएको छ कि चलचित्रले प्रेमका लागि कसरी युद्धसम्मको परिस्थिती सिर्जना हुन्छ भन्ने विषयलाई प्रस्तुत गर्नेछ।
Discussion about this post