प्रकाश सुब्बाको निर्देशनमा ‘मुन्धुम’ चलचित्रको छायाङ्कन सम्पन्न

विशेष अनलाइन । प्रकाश सुब्बाको लेखन तथा निर्देशनमा तयार भएको चलचित्र ‘मुन्धुम’को छायाङ्कन सम्पन्न भएको छ । चलचित्रको छायाङ्कन ताप्लेजुङको नुनढाकीदेखि फक्तालुङ सम्मका रमणीय स्थलमा गरिएको हो।

चलचित्रले याक्थुङ (लिम्बू) समुदायको मौलिक दर्शन, आस्था र विश्वासमा आधारित ‘सामसामा मुन्धुम’ को अभ्यासलाई पर्दामा उतारेको छ। निर्देशक सुब्बाका अनुसार, याक्थुङ समुदायले मान्ने दर्शन, विश्वास र आस्थालाई व्यापक दर्शकमाझ पुर्‍याउने उद्देश्यले यस चलचित्रको निर्माण गरिएको हो। उनका शब्दमा, “याक्थुङहरूले मान्ने मुन्धुमको आस्था र विश्वास पद्धति के हो र किन छ भन्ने कुरा चलचित्रमार्फत देखाउन खोजेका छौं।”

फक्तालुङ फिल्म्सको ब्यानरमा निर्माण भएको चलचित्रमा पूर्ण लिम्बू, सन्जु लिम्बु, प्रेम सुब्बा, विजय सन्योक सुब्बा, राज काउचा, अप्सरा शेर्मा, बिनिता राई सुब्बा, राज कुमार आङ्दाङ्बे, नारायण ल्वागुन, बिनिता लिम्बू, सागर केरुङ र सगर सिङलको मुख्य अभिनय रहेको छ ।

चलचित्रको को प्रोडक्सन डिजाइन राज थापा काउचाले गरेका छन् भने छायाङ्कन गङ्गा राम राईले गरेका छन्। मुख्य सहायक निर्देशकमा धड्कन लिम्बू, सहायक निर्देशकमा अस्मिता लावती, कला निर्देशनमा रुपक जिमी, प्रोडक्सन कन्ट्रोलरमा टिका कार्की र कार्यकारी निर्माता आयुब केसी रहेका छन्।

निर्माण पक्षले चलचित्रलाई आउँदो दसैँ–तिहारपछि प्रदर्शनमा ल्याउने तयारी गरेको जनाएको छ। मौलिक कथावस्तु र संस्कृतिमा आधारित यस चलचित्रले नेपाली चलचित्र क्षेत्रमा विशेष स्थान बनाउने अपेक्षा गरिएको छ।