विशेष अनलाइन । नेपाली चलचित्रमा दृश्य निर्माणमा सहज मार्ग अपनाउँदै कम्प्युटर ग्राफिक्स (VFX) र क्रोमाको अत्यधिक प्रयोग सामान्यजस्तै भइसकेको छ। तर, निर्देशक दीपेन्द्र के. खनाल यस्ता प्रविधिमार्फत ‘चिट’ गर्न खासै रुचाउँदैनन्। यथार्थवादमा विश्वास राख्ने उनी दर्शकलाई यथासम्भव जीवन्तता दिनका लागि वास्तविक परिवेशमै छायांकन गर्न अग्रसर रहने गरेका छन्।
उनकै निर्देशनमा निर्माणाधीन चलचित्र ‘क्याप्टेन साब’ यसको पछिल्लो उदाहरण बनेको छ। २०३०/४० सालको काठमाडौंको जीवनशैली र वातावरण देखाउनका लागि उनले तीनकुने क्षेत्रलाई नै पुरानो शैलीमा रूपान्तरण गरेका छन्। घरहरू सेतो र म्लान रङले रंगिएर विगतका दशक झल्काउने बनाइएका छन्। सडकमा पुराना सवारी साधन, खर्पन-डोकोसहित व्यापारमा लागेका पात्र, त्यसकालीन लुगामा सजिएका मानिसहरूको दृश्यमार्फत दशकौं अघिको काठमाडौं पुनः सजीव बनाइएको छ।
‘हामी व्यस्त काठमाडौंमा पुरानो शैलीका नयाँ घर बनाउन सक्दैनौँ,’ खनालले बताए, ‘तर त्यसको महसुस दिलाउने सेट तयार गर्न सकेका छौँ। २०३० र ४० सालको समयलाई मिहिनेतपूर्वक पुनर्निर्माण गरेका छौँ।’
चलचित्रको छायांकन सेटबाट सार्वजनिक तस्वीरहरूमा कलाकार खगेन्द्र लामिछाने र सुरक्षा पन्त प्रमुख भूमिकामा देखिन्छन्। खगेन्द्रले हातमा सानो बक्सा बोकेका छन् भने सुरक्षा काखमा बच्चा च्यापेर रिक्सामा चढ्ने तयारीमा छन्। दृश्यले चलचित्रका पात्रहरूको संघर्ष र समयको कठोरता झल्काउँछ।
‘क्याप्टेन साब’ नेपाली सेनाका पहिलो प्याराट्रूपर क्याप्टेन रामेश्वर थापाको जीवनमा आधारित हो। थापाद्वारा लिखित आत्मकथात्मक कृति **‘इन्टु द फायर’ (बारुदमाथि उड्दा)**मा आधारित चलचित्रको निर्देशन खनाल स्वयंले गरेका हुन्।
चलचित्रका सह-निर्मातामा करण श्रेष्ठ र श्रृष्टिमा खनाल छन् । निर्देशक खनालकै लेखन रहेको चलचित्रको छायांकन कृष्णबहादुर थापाले गरिरहेका छन्। पटकथा प्रोडक्सन र यार्सा स्टुडियोको प्रस्तुति रहेको चलचित्रको वितरणमा रिच इन्टरटेनमेन्टले सहकार्य गरेको छ।
Discussion about this post