मनोज दाहाल । पारम्परिक संस्कृतिको गन्ध र राई समुदायको जीवन दर्शनलाई पर्दामा उतार्दै निर्माण गरिएको नेपाली चलचित्र ‘नाकछोङ’ अब बेलायतको रजतपटमा प्रक्षेपण हुन लागेको छ। आगामी जुलाई २० तारिखका दिन ‘द आसफोर्ड सिनेमा’, यूकेमा आयोजना हुने विशेष शोका लागि सम्पूर्ण टिकट बिक्री भइसकेको निर्माता ज्योति राज राईले जानकारी दिएका छन्। दर्शकहरूको उत्साह र अग्रिम बुकिङको असाधारण मागले निर्माता र निर्देशकलाई हर्षित तुल्याएको छ।
चलचित्र प्रदर्शनको सम्पूर्ण व्यवस्थापन किरात राई यायोक्खा प्रा.का. स आसफोर्डले गरिरहेको छ।
निर्देशक किरण राईद्वारा निर्देशित ‘नाकछोङ’ उनको तेस्रो निर्देशन हो। यसअघि ‘लुङा’ र ‘जिउपंचौ’ जस्ता मौलिक कथानक चलचित्रहरू निर्देशन गरिसकेका उनले पुनः परम्परा र आधुनिकताको संगमलाई पर्दामा उतारेका छन्। पटकथा किरण राई र निर्माता ज्योति राज राईको सहकार्यमा तयार पारिएको हो।
चलचित्र राई समुदायको विवाह संस्कार, चाडपर्व, र कुलपितृ पूजामा महत्वपूर्ण मानिने ‘नाकछोङ’ अर्थात् बिजुवा पात्र वरिपरि घुम्छ। परम्परा र आधुनिकताको दोबाटोमा उभिएको समाजको आत्मसंघर्ष र सांस्कृतिक विरासतलाई चलचित्रले कलात्मक भाषामा प्रस्तुत गर्छ।
भुवन सिंह राई, यासेली योङ्हाङ, शुष्मा सुब्बा गुरुङ, सारा राई, ताया हाङ राई, अनुशा राई, सरोज राई लगायतका कलाकारहरूको अभिनयले कथालाई जीवन्त बनाएको छ भने बाल कलाकार जेशन राईले कथामा विशेष संवेदना थपेका छन्।
छायांकन बाबु श्रेष्ठले गरेका हुन्, जसले दृश्यहरूलाई जीवन्त र संवेदनशील बनाएका छन्। संगीतमा दिनेशकाजी वान्तवा र अनिल कोई राईको रचना, राजन मुकारुङ र विष्णु किरातीका शब्द र नोगेन लिम्बु तथा परेस राईको स्वरले चलचित्रलाई सांगीतिक मिठास दिएको छ।
यसअघि ‘लुङ्गा’, ‘संगम’, ‘त्रिवेणी’, ‘पापी मान्छे’, ‘वान वे’, ‘प्रोड्युसर’ जस्ता चलचित्र निर्माण गरिसकेका ज्योति राज राई ‘नाकछोङ’ मार्फत फेरि एकपटक मौलिकता, परम्परा र पहिचानको जगेर्ना गर्दै छन्।
यूके प्रदर्शनपश्चात् नेपालमा पनि चलचित्र सार्वजनिक गरिने तयारी निर्माण टिमले गरेको छ। ‘नाकछोङ’ केवल चलचित्र होइन, संस्कृति, सभ्यता र पहिचानको सुगन्ध बोकेको जीवन्त दस्तावेज हो, जुनले नेपालीपनलाई अन्तर्राष्ट्रिय स्तरमा गौरवका साथ प्रस्तुत गर्ने अपेक्षा गरिएको छ।
Discussion about this post