विशेष अनलाइन । नयाँ वर्ष २०८२ को पहिलो बिहानसँगै नेपाली चलचित्र क्षेत्र निकै चहलपहलपूर्ण देखिएको छ। बैशाख १ गते बिहान ११:३० बजेसम्मका अपडेटहरू अनुसार फिल्म नगरीमा एकपछि अर्को घोषणा भइरहेको छ। नयाँ वर्षसँगै चलचित्रकर्मीहरू निर्माण र प्रदर्शनका योजनासहित मैदानमा ओर्लिएका छन्।
जारी २ चलचित्रको निर्माण औपचारिक रूपमा घोषणा गरिएको छ र यो फिल्म दशैंको अवसरमा रिलिज हुने बताइएको छ।
यसैगरी, ‘मिरमिरे’, ‘पुष्पलता’, ‘ढुकढुकी’, ‘जदौ’, र ‘स्त्री’ चलचित्रहरूको निर्माण घोषणा गरिएको छ। यी सबै फिल्महरूले नयाँ स्वाद, नयाँ शिल्प र नयाँ जोश लिएर आउने अपेक्षा गरिएको छ।
रिलिज मितिका सन्दर्भमा, ‘सिटामोल’ चलचित्र साउन २३ गते, भने ‘पहाड’ कार्तिक ७ गते दर्शकमाझ आउनेछ। यी दुबै फिल्म दर्शकको प्रतिक्षाको सूचीमा रहेका छन्।
एकातिर निर्माण र प्रदर्शनको खबर आइरहँदा, ‘डबल ट्रिपल’ को रिलिज मिति भने पोस्पोन्ड गरिएको छ। यसअघि दशैंमा रिलिज हुने भनिएको यो फिल्म अब फागुन १ गते मात्र प्रदर्शनमा आउनेछ।
साथै, दुई चलचित्र ‘बोक्सीको घर’ र ‘मनसारा’ अब सिनेमाघर र ओटीटी प्लेटफर्म मार्फत एकसाथ सार्वजनिक गरिएको छ, जसले डिजिटल दर्शकमाझ पनि नेपाली फिल्मको पहुँच बढाइरहेको संकेत गर्छ।
यो वर्षको सुरुवातमै यति धेरै चलचित्रको निर्माण र प्रदर्शन घोषणा हुनु नेपाली फिल्म उद्योगको सक्रियता र आशावादी भावनाको संकेत हो। यदि यस्तै लहर साउन, दशैं र तिहारसम्म कायम रह्यो भने, २०८२ नेपाली सिनेमाको नयाँ युगको सुरुवात बन्न सक्छ।
Discussion about this post