चलचित्र ‘बलिदान’को छायाङ्कन ‘प्रविधि पूजा’सँगै शुभारम्भ

विशेष अनलाइन । सन्तोष सेनको निर्देशनमा बन्ने चलचित्र ‘बलिदान’को छायाङ्कन ‘प्रविधि पूजा’सँगै शुभारम्भ गरिएको छ ।शुक्रबार मोरङको सुन्दरहरैंचा स्थित पाथीभरा माताको मन्दिरमा पूजा गर्दै चलचित्रको शुभसाइत गरिएको हो ।

शनिवार सुन्सरीको इटहरीमा चलचित्रको पहिलो सट लिइएको छ, जसमा अभिनेत्री ऋचा शर्मा र केही बालकालकारहरूको दृश्य रहेको छ । निर्देशक सेनका अनुसार, केही दिनपछि समीर भट्ट, अर्पण थापा, सौगात मल्ल, र दिव्य देवलगायतका कलाकारहरुको छायाङ्कन हुनेछ । चलचित्रको कथा नेपालको माटोमाथि भइरहेको शोषण, निरङ्कुशता, र समाजका तथा कथित नाइकेहरूको अत्याचार आधारित रहेको छ ।

‘दक्षिण भारतका चर्चित प्राविधिकहरू, द्वन्द्व निर्देशक स्टन्डर साम र छायाकार शरण ऋषि लगायत ५० जनाको प्राविधिक टोलीले चलचित्र बलिदान’लाई निर्माण गर्नेछ । चलचित्र छायांकनका लागि इटहरी स्थित बिएमसी स्टुडियोमा भव्य सेट तयार गरिएको छ भने विराटनगर क्षेत्रमा पनि सेट निर्माण भएको छ । करिब ६० प्रतिशत छायाङ्कन सेटमै हुने निर्देशक सेनले जानकारी दिए ।

चलचित्रमा अभिनेता बिराज भट्टका छोरा समीर भट्ट, सौगात मल्ल, अर्पण थापा, दिव्य देव र ऋचा शर्माको पनि मुख्य भूमिका रहनेछ । आसुसेन फिल्मस् प्रा।लि। र सन्तोष सेनको प्रस्तुति रहेको चलचित्रका निर्माता पवन ब्राडफोर्ड बिस्ट र सह–निर्माता प्रेम पुरी रहेका छन् ।