बिशेष अनलाइन । नेपालमा यतिबेला राजनैतिक पार्टीहरुको महाधिवेशन चलचित्र रहेको छ । राजनितिक कार्यकर्तामात्रै नभएर पत्रकार तथा कलाकारहरु पनि महाधिवेशनमा सहभागी भएका छन् । यसैबिच चलचित्र निर्देशक तीर्थ थापा र सम्झना रौनियार उप्रेती नेपाली काँग्रेसको महाधिवेशन प्रतिनिधिमा चयन भएका छन् ।
थापा लमजुङबाट खस आर्य कोटा अन्तर्गत काँग्रेसको केन्द्रीय महाधिवेशन प्रतिनिधि चयन भएका हुन् भने रौनियार काठमाडौं क्षेत्र नम्बर १ बाट मधेसी कोटा अन्तर्गत महाधिवेशन प्रतिनिधिमा छानिएकी हुन् ।
नेपाली काँग्रेसको शुभेच्छुक संस्था नेपाल साँस्कृतिक संघका केन्द्रीय अध्यक्ष समेत रहेका थापाले काँग्रेसको केन्द्रीय सदस्यमा उम्मेदवारी दिने घोषणा गरेका छन् । उप्रेतीले भने काँग्रेसको सक्षम नेतृत्व चयनमा भूमिका खेल्ने छिन् ।
यता छक्का पञ्जा सिरिजका निर्माताहरु मध्यका एक निशान बजगाई पनि नेपाली काँग्रेसको महाधिवेशन प्रतिनिधिमा चयन भएका छन् । मकवानपुर जिल्लामा भएको क्षेत्रिय अधिबेशनमा १ नम्बर क्षेत्र बाट बजगाई महाधिवेशन प्रतिनिधि चुनिएका हुन् । निशान बजगाई सुनिता गौतम अर्थात हास्य टेलिश्रिंखला मेरी बास्सैकी मैयाका श्रीमान हुन् ।
थापा, उप्रेती र बजगाई महाधिवेशन प्रतिनिधिमा चयन हुदा यता निर्देशक तथा कोरियोग्राफर रिनाशा वान्तवा राई भने काँग्रेसको महाधिवेशन प्रतिनिधिमा पराजित भएकी छन् । इलाम क्षेत्र नम्बर २ बाट महाधिवेशन प्रतिनिधिको चुनावमा उठेकी राई महाधिवेशन प्रतिनिधिमा पराजित भएकी हुन् ।
आदिवासी जनजाति महिला कोटामा महाधिवेशन प्रतिनिधिका लागि उम्मेदवारी दर्ता गराएकी थिइन् । तीन जना महाधिवेशन प्रतिनिधि चयन हुने आदिवासी जनजाति महिला कोटामा पाँच जनाको उम्मेदवारी परेको थियो ।
Discussion about this post