बिशेष अनलाइन । “हाम्रो मन भित्र नेपाली चलचित्र” भन्ने नारा दिदै चलचित्र बिकास बोर्डको आयोजनामा प्रदेश २, बाराको निजगढमा चलचित्र सम्बन्धि विभिन्न बिधामा सात दिने आधारभुत प्रक्षिक्षण क्र्यास कोर्स तालिम सुरु भएको छ ।
तालिममा चलचित्र लेखन, निर्देशन, अभिनय, छायान्कान, सम्पादन, निर्माणका साथै बितरण बारे प्रशिक्षण दिइने कार्यक्रम सम्योजक तथा निर्देशक समाजकी अध्यक्ष रक्षा सिङ राणाले जानकारी दिएकी छन् ।
निजगढ स्थित होटल तारा इनमा सुरु भएको प्रशिक्षण कार्यक्रममा बारा , पर्सा, रौतहट र सर्लाही जिल्लाका तीस जना सहभागी रहेका छन् । सहभागीहरुलाई चलचित्र विकास बोर्डका अध्यक्ष दयाराम दहाल, निर्देशक समाजकी अध्यक्ष रक्षा सिङ राणा ,कलाकार युवराज लामा, निखिल उप्रेती , सन्तोष श्रेष्ठ , अनुप बराल, जनकदिप पराजुली , सामिप्य तिमल्सिना , पुनेन्द्र झा, पुरुशोतम प्रधान लगायतले सहजीकरण गर्ने निर्देशक समाजका सचिब अरुण प्रधानले जानकारी दिएका छन् ।
चलचित्र बिकास बोर्डले आयोजना गरेको कार्यक्रममा सह आयोजक चलचित्र तथा लोक सन्चार प्रबर्द्धन बोर्ड रहेको छ । सहयोगी सस्थाहरुमा निजगढ नगरपालिका , होटल तथा पर्यटन ब्यवासायी संघ, निजगढ हुन् भने कार्यक्रमको प्रस्तावक युवराज लामा हुन् ।
कार्यक्रमले प्रदेश २ मा स्थानीय स्तरमा चलचित्र प्रतिको आकर्षण बढ्ने निर्देशक समाजका महासचिव जनकदिप पराजुलीले बिस्वास गरेका छन् । निर्देशक समाजको संयोजनामा गरिएको उक्त कार्यक्रम मंसीर ७ गते सम्म चल्ने बताइएको छ ।
Discussion about this post