नायरा प्रसाईको बाल रक–पप गीत ‘विभिन्न जात–जाती’ सार्वजनिक

विशेष अनलाइन । नेपाली बालगीतको क्षेत्रमा पहिलो पटक रक–पप शैलीको गीत सार्वजनिक भएको छ । बाल प्रतिभा नायरा प्रसाईले गायन क्षेत्रमा डेब्यु गर्दै गाएको उक्त गीत ‘विभिन्न जात–जाती’ शुक्रबार सार्वजनिक गरिएको हो ।

वरिष्ठ गीतकार डा. ओमकृष्ण प्रसाईको शब्द तथा संगीतकार महेश ज्ञवालीको संगीत रहेको यस गीतलाई सञ्जय हमालले एरेन्ज गरेका छन् । बालसुलभ तर आधुनिक स्वरमा प्रस्तुत गीतलाई भिडियोमार्फत जीवन्त बनाउन बिमल ढकालले निर्देशन र छायांकन गरेका हुन् भने सम्पादन ललित सावदले गरेका छन् । गीत डा. प्रसाईकै युट्युब च्यानलमार्फत सार्वजनिक गरिएको हो ।

गीतमा नेपालभित्रको बहुजातीय, बहुभाषिक र बहुसांस्कृतिक सौन्दर्यलाई एकताको सूत्रमा बाँध्ने सन्देश दिइएको छ । “हातमा हात मिलाई संगै नाचौं साथी” भन्ने भावमार्फत आपसी मेलमिलाप र राष्ट्रिय एकताको महत्व उजागर गरिएको छ ।

यसमा दिदी–बैनी, दाजु–भाइबीचको सम्बन्ध, आमाको ममता, बाबाको सपना र झन्डालाई सगरमाथाको उचाइमा फहराउने आकांक्षा जोडिएको छ । यसले बालबालिकालाई असल, ज्ञानी र देशप्रेमी बन्न प्रेरणा दिन्छ ।

‘विभिन्न जात–जाती’ले परम्परागत बालगीत र आधुनिक रक–पप शैलीलाई मिसाउँदै नेपाली बालसंगीतलाई नयाँ आयाम दिने विश्वास लिइएको छ ।