विशेष अनलाइन । पछिल्लो समय नेपालको परिवेशलाई हेर्ने हो भने दिन प्रतिदिन युवाहरू बिदेसिने क्रम बढिरहेको छ । बढ्दो राजनीतिक वितृष्णा साथै देशमा आफ्नो भविष्य सुनिश्चित नदेखिए पछि युवाहरूले देश छाड्न बाध्य भएका छन् । यसैबिच युवाहरूको विदेश मोहका कारण नेपालमा वृद्ध वृद्धाले भोग्नुपरेको पिडा प्रस्तुत गरिएको म्युजिक भिडियो ‘गाह्रो भयो बुढ्यौली जीवन’ सार्वजनिक गरिएको छ । इटहरीको इलाइट सिनेमा हलमा एक कार्यक्रम गर्दै म्युजिक भिडियो सार्वजनिक गरिएको हो ।
कोसी प्रदेश आन्तरिक मामिला तथा कानुन मन्त्रालयकी राज्य मन्त्री माननीय सुनिता गुरुङको प्रमुख आतिथ्यतामा भएको कार्यक्रममा कोसी प्रदेशका विभिन्न स्रष्टाहरुको उपस्थिति रहेको थियो । कार्यक्रमलाई सम्बोधन गर्दै कोसी प्रदेश आन्तरिक मामिला तथा कानुन मन्त्रालयकी राज्य मन्त्री माननीय सुनिता गुरुङले नेपाली परिवेशको वर्तमान अवस्थालाई भिडियोले जस्ताको तस्तै प्रस्तुत गरेको उल्लेख गरिन् ।
नेपाल सम्भावनाको खानी रहेको उल्लेख गर्दै राज्य मन्त्री गुरुङले युवाहरूको विदेश मोहका कारण उत्पन्न परिस्थितलाई सामान्यरुपमा लिन नहुने बताइन् । शिक्षाविद् लेखनाथ घिमिरेले लोक भनेको जनता रहेको उल्लेख गर्दै गीतले जनताको मन भित्रको पिडा वकालत गर्न सफल रहेको उल्लेख गरे ।
चलचित्रकर्मी महासंघ कोसी प्रदेशका अध्यक्ष समेत रहेका म्युजिक भिडियोका निर्देशक अरुण कुमार प्रधानले नेपालको पछिल्लो समयको परिस्थितिलाई नियाल्दा अब सासले मात्र नभएर विदेशमा रहेको आफ्नो सन्तान आगमनका लागि लासले समेत पर्खिनुपर्ने अवस्थाको सृजना भएको उल्लेख गर्दै म्युजिक भिडियोमा सोही कथनलाई प्रस्तुत गरिएको उल्लेख गरे । लोक तथा दोहोरी गायक बालकृष्ण सिग्देलको शब्द सङ्गीत तथा स्वर रहेको ‘गाह्रो भयो बुढ्यौली जीवन’को म्युजिक भिडियोमा दिनेश कोइराला,उमा कार्की,किशोर थापा र नारायण भण्डारीको अभिनय रहेको छ ।
गीतको निर्देशन अरुण कुमार प्रधानले गरेका हुन् । सुमन तामाङले छायाङ्कन गरेको म्युजिक भिडियोको सम्पादन हेमन तामाङले गरेका हुन् ।
Discussion about this post