प्रकाश सपुतमाथिको आक्रमण अत्यन्तै निन्दनीय र आमानवीय-लोक दोहोरी प्रतिष्ठान

विशेष अनलाइन । यतिबेला रोमानियामा गायक प्रकाश सपुतमाथि गीत गाउने क्रममा क्यान बियरको बोतल प्रहार भएको विषयले चौतर्फी चर्चा पाएको छ । विभिन्न गायक तथा कलाकारहरुले दोसीमाथि कारवाहीको माग गरेका छन् । सपुतमाथि भएको आक्रमणको घटनाप्रति राष्ट्रिय लोक तथा दोहोरीगीत प्रतिष्ठानले भर्त्सना गरेको छ । प्रतिष्ठानले घटना अत्यन्तै निन्दनीय र आमानवीय भएको उल्लेख गरेको छ । प्रतिष्ठानले सोमबार एक विज्ञप्ति जारी गर्दै रोमानियामा सपुतमाथि भएको क्रियाकलाप निन्दनीय रहेको बताएको हो ।

प्रतिष्ठानले रोमानियामा रहेको कूटनीतिक नियोग र युरोपमा रहेको प्रतिष्ठानको शाखाको समेत ध्यानाकर्षण गराएको छ । विज्ञप्तिमा गीत गाउने क्रममा भएको बोतल प्रहारको घटनाप्रति गम्भीर ध्यानाकर्षण भएको जनाइएको छ । ‘यस्ता घटनाले कलाकारको मनोबल गिर्नुको साथै नेपाली दाजुभाइबाट हुने यस्ता अवाञ्छित क्रियाकलापले सबै नेपाली कलाकारको मन दुखेको छ,’ विज्ञप्तिमा भनिएको छ । सपुत राष्ट्रिय लोक तथा दोहोरीगीत प्रतिष्ठानका सचिव हुन् ।

आयोजक, त्यहाँस्थित कुटनैतिक नियोग एवं राष्ट्रिय लोक तथा दोहोरी गीत प्रतिष्ठान नेपाल, युरोप शाखाको समेत ध्यानाकर्षण गराउँदै यस्ता घटनाले कलाकारको मनोबल गिर्नुका साथसाथै आफ्नै नेपाली दाजुभाइबाट हुने यस्ता अवाञ्छनीय क्रियाकलापले सम्पूर्ण नेपाली कलाकारहरूको मन दुखेको छ ।’प्रतिष्ठानका अध्यक्ष रिता थापामगरद्धारा जारी विज्ञप्तिमा भनिएको छ ।

रोमानियामा गयराति नेपाली समय अनुसार १२ बजे स्टेजमा गीत गाइरहँदा गायक सपुतमाथि आक्रमण भएको थियो । उनको निधारमा सामान्य चोट लागेको सपुतसँगै रहेकी गायिका प्रीति आलेले जानकारी दिइन् । सपुतलाई हमला गर्ने नियतले नभई रक्सीको तालमा प्रहार भएको आयोजकले जनाएको छ ।