इटहरी / वरिष्ठ हास्य कलाकार मदनकृष्ण श्रेष्ठले कोरोनालाई जित्न सफल भएका छन् । दोस्रो पटक १४ दिन लामो अस्पतालमा उपचारपछि एक हप्ता अगाडि घर फर्किएका उनले सोमवार पीसिआर परीक्षण गराएका थिए । पछिल्लो पटक पिसिआर रिपोर्ट नेगेटिभ आएको उनका छोरा कलाकार यमन श्रेष्ठले जानकारी दिएका छन् भने हास्ष् कलाकार श्रेष्ठले पनि फेसबुकमार्फत् जानकारी उक्त कुराको पुष्टि गरेका छन् । सबैको आर्शिवाद र मायाको बलले आफूले कोरोना जित्न सफल भएको उनले बताएका छन् ।
श्रेष्ठले हास्य शैलीमा आफुलाई कोरोनाले निकै गाह्रो बनाएको बताएका छन् । , ‘कोरोनाले मलाई पछार्न त नराम्रैसँग पछार्यो । पछार्यो मात्र हैन अझ लछार्यो र हस्पिटलमा लगेर बेस्कन बजार्यो, ओर्कायो, फर्कायो, थर्काउनु थर्कायो बेला बेलामा तर्सायो पनि । बलियो रहेछ बजिया । तर सबैको माया, शुभेक्षा, प्रार्थना, र आर्शिवादले गर्दा मलाई त्यसले जित्न भने सकेन । शरीरमा अलिअलि शिथिलता भने बाँकी नै रहेको छ ’ उनले भनेका छन् ।
पहिलो पटक ८ दिन अस्पतालमा उपचारपछि घर फर्किएका उनी त्यसको केही दिनमै अक्सिजनको लेभल कम भएपछि पुनः ललित्पुरको मेडिसिटी हस्पिटलमा भर्ना भएका थिए । चिकित्सकले अब आफ्नो शरीर एन्टिबडी बनिसकेको र कसैको शरीरमा पनि कोरोना नसर्ने बताएको उनले उल्लेख गरेका छन् ।
उनले ठट्यौली शैलीमा अगाडि लेखेका छन्, ‘कोरोनाले यो मदनकृष्ण श्रेष्ठ भन्ने मान्छेलाई पार्केसन छ, प्रोष्टेट, प्रेशर, मुटुको समस्या छ, कन्स्टीपेशनको पनि समस्या छ र यसलाई त मज्जाले चपाउन सकिन्छ भनेर मलाई झम्टिन आएको होला सायद । यहाँहरु जस्तो मलाई औधी माया गर्नुहुने लाखौँ लाख शुभेक्षकहरु मेरै साथमा हुनुहुन्छ भन्ने कुरा त्यो मोरा कोरोनालाई के थाहा ।’ अहिले देशको सबैभन्दा ठूलो समस्या कोरोना भएको र नेपाल सरकारले पहिलो प्राथमिकमा कोरोना भाइरस बिरुद्धको खोप लगाएर जनताको ज्यान बचाउनु अपरिहार्य रहेको उनले बताएका छन् ।
उनका छोरा र बुहारीलाई भने यस अघि नै कोरोना नेगेटिभ आइसकेको छ ।
Discussion about this post